Bakının yaxınlığında yerləşən 1 saylı Bakı (Kürdəxanı) Təcridxanasında saxlanılan jurnalist İmran Əliyev noyabrın 18-də başladığı aclıq aksiyasını dünən dayandırıb.
"Məclis.info" saytının rəhbəri olan Əliyev hərəkətlərində cinayət tərkibi olmadığını əsas gətirərək azadlığa buraxılmasını tələb edirdi.
Valideynləri ilə telefon danışığında Əliyev səhhətinin pisləşməsi səbəbindən aclıq aksiyasını könüllü olaraq dayandırmaq qərarına gəldiyini bildirib.
Jurnalist onurğa yırtığından əziyyət çəkir və hündür boylu olduğuna görə həbsxana çarpayısına yerləşə bilmir, bu isə onun bel ağrılarını artırır.
"Təcridxanada İmrana heç bir təzyiq edilməyib, aclıq aksiyasını dayandırmaq qərarını özü, könüllü olaraq qəbul edib”, - deyə onun dostu Elgiz Qəhrəman "Turan" agentliyinə bildirib.
Əliyev həftədə iki dəfə evə və ya E.Qəhrəmana zəng edir və təcridxana personalının ona olan münasibətindən şikayətlənməyib.
Penitensiar Xidmət "Turan"ın İmran Əliyevin aclıq aksiyası ilə bağlı sorğusuna cavab verməyib.
Əliyev aprelin 18-də pro-hökumət mediasında onun Abzas Media və Toplum.TV əməkdaşlarına qarşı işlərlə əlaqələndirilməsindən sonra saxlanılıb.
"""
"Məclis.info" onlayn platformasının rəhbərinə xarici valyutanın qaçaqmalçılığı ilə bağlı ittiham irəli sürülüb, bu isə "Abzas Media" əməkdaşlarına qarşı irəli sürülən ittihamlarla oxşardır.
Əliyevin yaxınları onun ittihamları rədd etdiyini və elektrik cərəyanı ilə işgəncə altında etiraf etməyə məcbur edildiyini bildiriblər.
Əliyev işgəncələr barədə məlumat yayımlandıqdan sonra yenidən döyüldüyünü bəyan edib.
Aprelin 26-da Əliyevə qarşı əlavə ittiham irəli sürülərək ona Azərbaycan Cinayət Məcəlləsinin 206.3.1-ci (təkrar qaçaqmalçılıq) maddəsi ilə cinayət işi açılıb.
Bu ittiham ilkin 206.3.2-ci (qrup halında qaçaqmalçılıq) maddəsinə əlavə edilib.
İyun ayında Bakı məhkəməsi Əliyevin ilkin həbs müddətini uzadıb.
Hüquq müdafiə təşkilatları İmran Əliyevi siyasi məhbus kimi tanıyıb.
Noyabrın 7-də Bakı şəhəri Xətai Rayon Məhkəməsində Əliyevin həbs-qətimkan tədbirinin dəyişdirilməsi və onun ev dustaqlığına buraxılması barədə vəsatətin müzakirəsi keçirilib. Lakin Əliyev məhkəməyə gətirilməyib və yaxınlarının bildirdiyinə görə, o, prosesə təcridxanadan onlayn şəkildə qoşulub.
