ABŞ-ın yeni seçilmiş prezidenti Donald Tramp Riçard Qreneli Rusiya-Ukrayna müharibəsi üzrə xüsusi elçi təyin etməyi düşünür. O, respublikaçıların keçmiş kəşfiyyat şefidir.
Bu barədə Qaynarinfo "Reuters”ə istinadən xəbər verir.
Məlumdur ki, Qrenell Trampın ilk prezidentlik dövründə (2017-2021) ABŞ-ın Almaniyadakı səfiri olub və Milli Kəşfiyyatın direktoru vəzifəsini icra edib.
O, son nəticədə yeni seçilmiş ABŞ prezidentinin xüsusi elçi seçiləcəyi təqdirdə müharibəni bitirmək səylərində əsas rol oynayacaq.
Mənbələr dəqiqləşdirib ki, hazırda təkcə Rusiya-Ukrayna müharibəsinin həllinə həsr olunmuş xüsusi nümayəndə olmasa da, Tramp belə bir vəzifə yaratmaq imkanını nəzərdən keçirir.
Eyni zamanda Tramp Ukraynada müharibə ilə bağlı xüsusi nümayəndə yaratmamaq qərarına da gələ bilər. Amma bunu edərsə, rolu yerinə yetirmək üçün başqa birini seçə bilər. Üstəlik, Qrenellin razılaşacağına heç bir zəmanət yoxdur.
Qrenell razılaşarsa, onun bəzi mövqeləri Ukrayna liderlərini düşünməyə vadar edə bilər. Belə ki, iyul ayında "Bloomberg”in təşkil etdiyi dəyirmi masa zamanı o, münaqişənin həlli vasitəsi kimi "muxtar zonaların” yaradılmasını təklif edib. O, həmçinin Ukraynanın yaxın gələcəkdə NATO-ya qoşulmasını dəstəkləməyəcəyini bildirib, bu da Trampın bir çox müttəfiqləri ilə bölüşdüyü mövqedir.
Qrenellin tərəfdarları onun uzun diplomatik karyerasına və Avropa məsələlərinə dərindən bələd olduğunu qeyd edirlər. Qrenell Almaniyada səfir olmaqla yanaşı, Serbiya və Kosovoda sülh danışıqları üzrə prezidentin xüsusi nümayəndəsi kimi də fəaliyyət göstərib.
"Reuters” əlavə edib ki, noyabrın 5-də keçiriləcək seçkilər ərəfəsində Tramp üçün kampaniya aparan Qrenell dövlət katibi postuna əsas namizədlərdən biri olub.
Nizami Bağırov
