ABŞ-ın Koreya yarımadasındakı "düşmənçilik hərəkətləri" KXDR ilə müharibəyə səbəb ola bilər. AFN.az Koreya Mərkəzi Teleqraf Agentliyinə istinadən xəbər verir ki, bu barədə KXDR Müdafiə Nazirliyinin mətbuat xidmətinin rəhbəri bildirib.“Bu gün qlobal miqyasda ABŞ hərbi avantürizmi təhlükəli xətti keçdikdə, sərt hərbi-siyasi vəziyyət ABŞ-ın dövlətimizə qarşı hərbi hərəkətlərinin hər an real müharibəyə çevrilə biləcəyini proqnozlaşdırır”, - Pxenyan rəsmisi bildirib. O, Koreya Respublikası və Yaponiyanın iştirak etdiyi “Freedom Edge” təlimlərini, “Kolumbiya” sualtı gəmisinin Pusana səfərini və RC-135S kəşfiyyat təyyarəsinin uçuşunu xatırladıb.“Biz qəti şəkildə xəbərdarlıq edir və tələb edirik ki, ABŞ və onun KXDR-ə düşmən olan peykləri Koreya yarımadasında və onun ətrafında hərbi qarşıdurmanı əsl silahlı münaqişəyə gətirib çıxara biləcək növbəti təxribatçı və sabitliyi pozan düşmənçilik hərəkətlərini dərhal dayandırsınlar”, - deyə Müdafiə Nazirliyinin mətbuat xidmətinin rəhbəri əlavə edib.
