"Səbail"in baş məşqçisi Cavid Hüseynov Misli Premyer Liqasının 14-cü turunda "Qarabağ"a 0:3 hesabı ilə məğlub olduqları görüşü dəyərləndirib.
Fanat.Az xəbər verir ki, debüt oyununa çıxan "dənizçilər"in baş məşqçisi Cavid Hüseynov uduzduqları görüşlə bağlı belə danışıb:
"Qarabağ"ı təbrik edirəm. Bizim üçün üzücü məğlubiyyət oldu. Düşünürəm ki, komandanın potensialı var. Yaxın gələcəkdə istədiyimiz nəticəni alacağıq. Heyətlə bağlı sıxıntılarımız var idi. Futbolçu kasadlığı yaşayırıq. Xüsusilə də hücum xətti ilə bağlı problem var. Qışda yeni transferlərə ehtiyac var. Fiziki hazırlığımız o qədər də ürəkaçan olmadığı üçün 90 dəqiqə dözə bilmədik. Amma 70 dəqiqə yaxşı futbol oynadıq.
Heyət geniş olanda hansısa sistem dəyişikliyi edə bilərik. İkinci hissədə səhvlərə yol verdik. Çünki komandanın fiziki hazırlığı mən gələnə qədər ürəkaçan səviyyədə olmayıb. Mən də on gündür buradayam. Qısa müddət ərzində bacardığım qədər fiziki durumu irəli aparmışam. Dörd gün öncə İspaniyadan fiziki hazırlıq üzrə məşqçi dəvət etmişik.
Sistemi otuzdurmaq bir həftənin, on günün işi deyil. Bunu başa düşürdüm. Bu oyun bizə nəyin üzərində daha çox işləməli olduğumuzu göstərəcək. Bu il məqsədimiz Premyer Liqada qalmaqdır. Bunun üçün əlindən gələni edəcəyəm".
