ABŞ-nin "Walt Disney Co." şirkəti ortasəviyyəli menecerlik vəzifələrində çalışan qadınlara, eyni vəzifələrdə çalışan kişilərə nisbətən daha az maaş verdiyi iddialarını həll etmək üçün 43.3 milyon dollar ödəməyə razılaşıb.
hakimiyyet.az xəbər verir ki, bu barədə "The Wall Street Journal" məlumat yayıb.
Razılaşma, 2019-cu ildə şirkətdə çalışan məhsul meneceri LaRonda Rasmussenin "Disney"ə qarşı qaldırdığı iddia ilə başlayan məhkəmə mübahisəsini yekunlaşdıracaq. Daha sonra iddiaya doqquz nəfər daha qoşulub.
İddia ərizəsində bildirilir ki, təxminən on illik dövr ərzində "Disney" ortasəviyyəli qadın menecerlərə, oxşar təcrübə və bacarıqlara malik kişi həmkarlarına nisbətən ümumilikdə 151 milyon dollar az maaş ödəyib.
"Disney" isə bu ittihamları rədd edir və razılaşmanı qəbul etməsinə baxmayaraq, iddiaları təsdiq etmir. Şirkət açıqlamasında bildirib: "Biz həmişə işçilərimizə ədalətli maaş verməyə çalışmışıq".
Razılaşma hələ də məhkəmə hakiminin təsdiqini tələb edir. Bu razılaşma şirkəti uzunmüddətli məhkəmə araşdırmaları və andlılar məhkəməsindən qoruyacaq.
Qeyd edək ki, "Disney" səhmləri çərşənbə axşamı ticarət zamanı 0.2% ucuzlaşıb. Cari ilin əvvəlindən etibarən şirkətin səhmlərinin dəyəri 28.5% artıb.
