Rusiyanın “Qazprom” korporasiyasının 2025-ci il planında qazın Ukrayna üzərindən Avropaya nəqli nəzərdə tutulmayıb.
Reyting.az “Reuters” agentliyinə istinadla bildirir ki, Rusiya lideri Vladimir Putin Ukrayna üzərindən qaz tədarükünü davam etdirməyə hazır olduqlarını desə də, qaz nəhənginin planları ilə tanış olan şəxs fərqli fikirdədir.
Mənbənin sözlərinə görə, Moskvanın əsas ssenarisi dekabrın 31-dən sonra Ukrayna ərazisindən qaz nəqlinin olmamasıdır. Bu səbəbdən Avropa ölkələri və Türkiyənin də daxil olduğu “uzaq xaricə” ixracın beşdə bir azalacağı gözlənilir. Bura “Türkiyə” və “Mavi axın” qaz kəmərləri ilə tədarük daxildir, lakin 38 milyard kubmetrə çata biləcək “Sibirin gücü” qaz kəməri ilə Çinə ixrac daxil deyil. Eyni zamanda, “Qazprom” hesab edir ki, Türkiyəyə tədarükün azalma ehtimalıazdır.
Xatırladaq ki, 2019-cu ildə “Naftoqaz” və “Qazprom” Ukrayna ərazisindən qaz nəqli ilə bağlı müqavilə imzalayıb. Onun səlahiyyət müddəti bu ilin sonunda başa çatır. Kiyev bildirib ki, onlar Moskva ilə sazişin müddətinin uzadılması və ya yenisinin təsdiqlənməsini müzakirə etməyi planlaşdırmırlar.
“Şimal axını” qaz kəməri sıradan çıxdıqdan sonra Rusiya demək olar ki, bütün avropalı müştərilərini itirib. KİV-in məlumatına görə, 2023-cü ildə o, Ukrayna ərazisindən təxminən 15 milyard kubmetr qaz nəql edib ki, bu da 2018-2019-cu illərdə müxtəlif marşrutlar üzrə Avropaya pik axının yalnız 8 faizidir.
Ekspertlər bildirirlər ki, qaz nəqlinin dayandırılması səbəbindən “Qazprom” illik gəlirlərində təxminən 6 milyard dollar, Ukrayna isə 800 milyondan 1,2 milyard dollara qədər itirəcək.
V. QULİYEV
