Tovuzda ölümlə nəticələnən ağır yol-nəqliyyat hadisəsi qeydə alınıb.
“Qafqazinfo” xəbər verir ki, qəza qarşı tərəfdən gələn “Mercedes” markalı avtomobilin qəfil hərbçilər olan “VAZ”ın qarşısına çıxması nəticəsində baş verib.
İlkin məlumata əsasən qəzada 6 nəfər ölüb.
Hələ ki, ölənlərin şəxsiyyəti müəyyən edilməyib.
***
Oxu.az-ın məlumatına görə, qəzada ölənlərdən 5 nəfəri hərbçidir.
***
Fövqəladə Hallar Nazirliyi qəza ilə bağlı məlumat yayıb.
Bildirilib ki, hadisə yerində əməliyyat şəraiti qiymətləndirilərkən “Mercedes” markalı minik avtomobili ilə “VAZ 2106” markalı minik avtomobilinin toqquşması nəticəsində yol-qəza hadisəsinin baş verdiyi və deformasiyaya uğramış nəqliyyat vasitələrində sıxılı vəziyyətdə qalanların olduğu müəyyən olunub.
Xilasedicilər xüsusi vasitələrin köməyi ilə “Mercedes” markalı minik avtomobilində sıxılı vəziyyətdə qalan yeniyetməni xilas edərək təcili tibbi yardım briqadasına təhvil veriblər.
Yol-nəqliyyat qəzası zamanı həyatını itirmiş altı nəfərin meyiti aidiyyəti üzrə təhvil verilib.
Yanğınsöndürənlər tərəfindən ərazidə zəruri təhlükəsizlik tədbirləri görülüb.
Hadisə ilə əlaqədar müvafiq qurumlar tərəfindən təhqiqat aparılır.
***
TƏBİB-dən “Qafqazinfo”ya verilən məlumata görə, baş vermiş ağır yol-nəqliyyat hadisəsi nəticəsində xəsarət alan 2011-ci il təvəllüdlü yeniyetmə (kişi cinsli) saat 20:40 radələrində aqonal vəziyyətdə Tovuz Rayon Mərkəzi Xəstəxanasının Təcili və təxirəsalınmaz tibbi yardım şöbəsinə hospitalizasiya olunub.
Başın, döş qəfəsinin, bədənin müxtəlif nahiyələrinin qapalı və açıq zədələnməsi diaqnozu ilə ona zəruri tibbi yardım göstərilib və pasiyent əməliyyat blokuna alınıb. Hazırda vəziyyəti ağır qiymətləndirilir.
Qəza nəticəsində 6 nəfərin ölüm faktı qeydə alınıb.
***
Əldə etdiyimiz məlumata görə, qəzada 5 hərbçidən başqa, mülki şəxs, “Mercedes” markalı avtomobilin sürücüsü Elmar Həsənov da həlak olub.
Onun oğlu, 13 yaşlı Z.Həsənov isə ağır bədən xəsarəti alaraq Tovuz Mərkəzi Rayon Xəstəxanasına yerləşdirilib.
Qeyd edək ki, xidmətdən kənar vaxtda şəxsi avtomobilin qəzaya uğraması nəticəsində Azərbaycan Ordusunun 5 hərbi qulluqçusu - baş gizir Qurbanov Ruslan Əhliman oğlu, müddətdən artıq həqiqi hərbi xidmət hərbi qulluqçuları baş çavuş Alıyev Qabil Qaybalı oğlu, çavuş Əliyev Bəhlul Aydın oğlu, çavuş Əhmədov Qələndər Mail oğlu və kiçik çavuş Mehdiyev Turan Cavad oğlu həlak olub.
Yunis Quliyev
