Avropa Liqasında “Lion”la oyun “Qarabağ” üçün uğursuzluqla nəticələndi. Azərbaycanın avrokuboklardakı yeganə təmsilçisi 90 dəqiqə ərzində rəqibdən çox da geri qalmasa da, həlledici məqamlarda daha soyuqqanlı və daha peşəkar davranan Fransa təmsilçisi Bakıdan 3 xalla ayrılmağı bacardı. Bu məğlubiyyət həm də “Qarabağ”ın avrokuboklardakı perspektivinə kölgə salmış oldu. Ümidlər tükənməsə də, xeyli azaldı. Bir sözlə, səviyyə fərqinin nə olduğunu yenidən görmüş olduq.
“Qarabağ”ın Azərbaycan çempionatındakı rəqibləri də bu yenilgidən sonra xeyli ümidlənmişdilər. Xüsusən də “Neftçi”. Çünki “Qarabağ”ın “Lion”dan sonrakı rəqibi məhz “Neftçi” idi, 15-ci turda məhz bu iki komanda üz-üzə gələcəkdi. Özü də “Neftçi”nin meydanında. Əlsində hələ birinci dövrədə “Neftçi” “Qarabağ”ı öz meydanında qəbul etməliydi. Amma təmirdən yeni çıxan “Neftçi Arena”nın siftəsini korlamamaq üçün yüngül bir biclik işlədildi, oyunun yeri dəyişildi. Artıq bu dəfə “qaçmağa” yer qalmamışdı. “Neftçi” əzəli rəqibi doğma meydanda qəbul etməliydi. “Lion”la oyununu fiziki və psixoloji yorğunluğu bu yerdə “Neftçi”nin işinə yaramalıydı, “ağ-qaralar” bu fürsətdən maksimum yararlanmalıydı.
“Neftçi” üçün prinsipial sayılan bu qarşılaşmaya Qurban Qurbanov sıradan bir premyer-liqa oyunu kimi, növbəti 3 xal mübarizəsi kimi yanaşdı. Elə bunun da nəticəsi idi ki, “Lion”la oyunda meydana çıxan, xeyli güc sərf edən əsas heyət üzvləri “Neftçi”yə qarşı ilk dəqiqələrdən oyuna qoşulmamışdılar. Onlar Qurbanovun yanında, yəni ehtiyat oyunçular skamyasında idi. Azərbaycan futbolu ilə az-çox maraqlananlar, “Qarabağ”ın futbolçularının gücünə bələd olanlar gördülər ki, “Qarabağ” “Neftçi”yə qarşı faktiki ikinci heyətlə oynayırdı. Bu da Samir Abasova və onun komandasına kömək edəcək bir məqam kimi “Neftçi”yə könül verənləri, onun qələbəsini arzulayanları ümidləndirmişdi. Amma olmadı. “Qarabağ” son illərdə adət etdiyi kimi “Neftçi”ni “quru” və böyük hesabla məğlub etdi. 90 dəqiqənin sonunda 0:3 hesabı qeydə alındı.
Bu görüşdə qalib gəlmək həvəsinin gücündən, yaxud da “Lion”la matçın yorğunu olan “Qarabağ”ı büdrətməyin asan olacağına bəslənən ümidin çoxluğundan idi, bilmirəm. “Neftçi” rəhbərliyi görüşdən öncə heç də ənənəvi olmayan bu şouya imza atmışdı. Yayda Parisdə keçirilən Yay Olimpiya Oyunlarında qalib olmaqla bütün Azərbaycanın qüruruna çevrilən cüdoçu Hidayət Heydərovu “Neftçi”nin bazasına gətirmişdilər. Baş məşqçi Samir Abasov və futbolçular onunla şəkil çəkdirdilər, cüdoçu da onlara dəstəyini ifadə etdi. Onun açıqlamasında belə qeyd olunur ki, Heydərov uşaqlıq illərindən “Neftçi”nin azarkeşi olduğunu bildirib.
Əlbəttə, burda qəribə heç nə yoxdur. Azərbaycanda müəyyən nəsil futbol azarkeşləri gözlərini açandan “Neftçi”ni görüb, ona könül verib. Eynilə “Neftçi” topu” söhbətində olduğu kimi. Olimpiya çempionu Hidayət bəy də belələrindən ola bilər. Yanılmıramsa, Hidayətin yüksəlişində “Neftçi” İSM-in rəhbəri Sadıq Sadıqovun da böyük rolu var. Sadıq bəy çoxlarına “Neftçi”ni sevdirib. Amma bu olimpiya çempionunun bu sevgini məhz indi açıqlamasında bir qədər zaman uyğunsuzluğu var idi. Şəxsi qənaətimdi ki, bütün xalqın sevimlisinə çevrilən cüdoçu “Lion”la oyundan ağır yenilgiylə ayrılan, deməli, yaralı olan “Qarabağ”la oyun ərəfəsində “Neftçi”nin düşərgəsinə baş çəkməklə yüngülvari səhv edib. Diqqətimi o da çəkdi ki, həmin xəbərlərin sonunda Hidayətin “Qarabağ”la oyunda tribunada olacağı vurğulanırdı. Yəni ki, Heydərov “Qarabağ”a qarşı “Neftçi”ni dəstəkləyəcək, siz də ona qoşulun.
Nəticəsini hamı gördü. “Qarabağ” az güc sərf etməklə “Neftçi”nin qapısına üç cavabsız top vurmaqla Heydərovu və onun kimi ağ-qara rənglərə könül verənləri üzdü. Kaş ki, “Neftçi” tərəfi Olimpiya çempionu ilə reklam olunmaq üçün doğru zaman seçəydi, bunu “Qarabağ”la oyun ərəfəsində etməyəydi. Ara yerdə o boyda cüdoçunu “Qarabağ” azarkeşlərinin gözündə rəqibə çevirdilər. Çünki bu reklam da “Neftçi”ni ağır məğlubiyyətdən xilas etmədi, “Qarabağ” səviyyə fərqini hamıya nümayiş etdirdi. Bu fərqi ört-basdır etmək üçün olimpiya çempionunun nüfuzu da yetərli olmadı. Nə deyək, keçmiş olsun!
AMAL
