Türkiyə Prezidenti Administrasiyasının Kommunikasiya İdarəsi tərəfindən təşkil olunan 4-cü Beynəlxalq Strateji Kommunikasiya Forumunun (Stratcom Summit'24) dekabrın 13-14-də İstanbulda keçirilməsi planlaşdırılır. Forumun mövzusu "Kommunikasiyada Süni İntellekt: Trendlər, Tələələr və Keçid" olacaq.
Fins.az xəbər verir ki, Türkiyənin ən böyük kommunikasiya sammiti olan Stratcom Summit'24, süni intellektin kommunikasiya sahəsində yaratdığı transformasiyaları müzakirə etmək üçün beynəlxalq kommunikasiya sahəsinin önəmli simalarını bir araya gətirəcək.
Forumun açılışında Türkiyə Baş nazirinin müavini Cevdet Yılmaz və Prezidentin Kommunikasiya İdarəsinin rəhbəri Fahrettin Altun çıxış edəcəklər. Forumda həmçinin Türkiyənin Xarici İşlər Naziri Hakan Fidan, informasiya, kommunikasiya və media nazirləri, habelə bir sıra ölkələrin kommunikasiya rəhbərləri iştirak edəcək. Forumda Birləşmiş Millətlər Təşkilatının Ümumdünya Kommunikasiya üzrə Başçı müavini Melissa Fleminqin video mesajı da iştirakçılara təqdim ediləcək.
Forumda, Prezidentin Xarici Siyasət və Təhlükəsizlik üzrə Baş müşaviri Akif Çağatay Kılıç, Azərbaycan Respublikasının Prezidentinin köməkçisi Hikmət Hacıyev, Liviya Milli Hökumətinin Kommunikasiya və Siyasi Əlaqələr üzrə Dövlət Naziri Walid Ammar Al-Lafi, Livan İnformasiya Naziri Ziad Makary, Serbiya İnformasiya və Telekommunikasiya Naziri Dejan Ristić, Pakistan İnformasiya və Yayım Naziri Attaullah Tarar, Fələstin Telekommunikasiya və Rəqəmsal İqtisadiyyat Naziri Dr. Abdul Razzaq Al-Natsheh, Qabon Kommunikasiya və Media Naziri Lourens Ndong, Şimali Kipr Türk Cümhuriyyətinin Xarici İşlər Naziri Tahsin Ertuğruloğlu, NATO-nun İctimai Diplomatiya üzrə köməkçisi Marie-Doha Besancenot və digər bir sıra ölkələrin kommunikasiya müəssisələrinin rəhbərləri çıxış edəcəklər.
30 ölkənin iştirakı ilə 3,000-dən çox qonaq İstanbulda bir araya gələcək
İki gün davam edəcək proqramda süni intellektin kommunikasiya sahəsində yaratdığı transformasiyalar geniş şəkildə müzakirə ediləcək, yeni texnologiyaların gətirdiyi imkanlar və çağırışlar araşdırılacaq. Stratcom Summit'24 süni intellektin kommunikasiya sahəsindəki transformasiyaedici təsirinə diqqət yetirəcək və ictimai kommunikasiya, yeni kommunikasiya strategiyaları, jurnalistika, rəqəmsal media və diplomatiya, dezinformasiyaya qarşı mübarizə və böhran idarəetməsi, rəqəmsal etik və kibertəhlükəsizlik kimi mövzuları əhatə edəcək.
Beynəlxalq Strateji Kommunikasiya Forumunda 30 ölkədən 64 türk və xarici ekspert iştirak edəcək. Bu ekspertlər dövlət qurumlarını, özəl sektoru, qeyri-hökumət təşkilatlarını, media orqanlarını, akademiyanı və düşüncə mərkəzlərini təmsil edəcəklər.
Forumda 8 panel, 4 çıxış və 6 fərdi sessiya keçiriləcək. Dövlət qurumlarından, özəl sektordan, qeyri-hökumət təşkilatlarından və düşüncə mərkəzlərindən olan kommunikasiya ekspertləri, həmçinin akademiklər və universitet tələbələri tədbirdə iştirak edəcəklər.
İlk gün "Milli Strategiyada Süni İntellekt: Rəqəmsal Transformasiya və Strateji Kommunikasiya üzrə Dövlət Baxışları", "Rəqəmsal Şəffaflıq vs Məlumat Təhlükəsizliyi: Tarazlığın Tapılması", "Beynəlxalq Strateji Kommunikasiyada Süni İntellekt: Əməkdaşlıq və Tənzimləmə", "Dezinformasiyaya qarşı mübarizədə Süni İntellekt: Dövlət Quruluşları üçün Alətlər və Strategiyalar" panel müzakirələri olacaq.
Eyni zamanda, ilk günün sonunda üç fərdi sessiya keçiriləcək. Akif Çağatay Kılıç "Türkiyə Hökumətinin Milli Təhlükəsizlik Baxışları: Süni İntellekt Dövründə", Hikmət Hacıyev "Süni İntellekt və Strateji İnkişaf: Azərbaycanın Gələcəyinə Baxış", Dr. Abed-Alrazzaq Natsheh isə "Rəqəmsal Transformasiyanı Hərəkətə Keçirmək: Fələstinin Telekommunikasiya Baxışlarından Təhlillər" mövzusunda çıxış edəcəklər.
Stratcom Summit'in ikinci günündə mütəxəssislər "Böhran Kommunikasiyasında Süni İntellekt: İctimai Təhlükəsizlik üçün Real Vaxt Strategiyaları", "Kommunikasiyada Süni İntellektlə İstifadə Edilən Kibertəhlükəsizlik: Etibarı və Güvəni Qoruma", "Jurnalistikada Süni İntellektin Təsiri: Dəqiqlik, Obyektivlik və Deepfake Təhlükəsi" və "Süni İntellektlə Aktivləşdirilmiş Kommunikasiyada Etika: Şəffaflıq və Hesabatlılıq" mövzularında fikirlərini paylaşacaqlar.
"Kommunikasiya, xarici siyasət və dövlətlərarası əlaqələrin yeni texnologiyalarla dəyişməsini müzakirə etmək üçün mühüm bir platforma olan Stratcom Summit 24, beynəlxalq əməkdaşlığı gücləndirəcək", – deyə Prezidentin Kommunikasiya İdarəsinin rəhbəri Fahrettin Altun bildirib.
Altun qeyd edib ki, Stratcom'un 2021-ci ildən bəri bir qlobal platformaya çevrildiyini və dünyanın müxtəlif yerlərindən kommunikasiya mütəxəssisləri ilə bir araya gəldiyini görməkdən məmnun olduqlarını vurğulayıb: "Bu il İstanbulda keçiriləcək Stratcom Summit'24, süni intellektin kommunikasiya sahəsindəki trendlərini, tələələrini və keçidini müzakirə edərək gələcək üçün ən yaxşı həll yollarını təqdim edəcək."
