Gəncə Dövlət Universitetinin rektoru Yusif Yusibovun rəhbərlik etdiyi nümayəndə heyəti Dokuz Eylül Universiteti ilə akademik əməkdaşlığı daha da genişləndirmək məqsədilə hazırda Türkiyədə işguzar səfərdədir.
Nümayəndə heyəti Dokuz Eylül Universitetində Biologiya ixtisası üzrə ikili diplom proqramında təhsil alan birinci və ikinci kurs tələbələri ilə də görüş keçirib. Nümayəndə heyəti tələbələrlə dərs keçdikləri auditoriyada görüşüb. Görüş zamanı ikili diplom proqramının üstünlüklərindən danışan rektor Yusif Yusibov Türkiyədə təhsil almaq imkanının gənclər üçün böyük şans olduğunu qeyd edib və bu proqramda təhsil alan tələbələrin gələcəkdə peşəkar kadr kimi yetişəcəklərindən əmin olduğunu deyib. Rektor tələbələrin problemleri ilə maraqlanıb və mövcud olan problemlərini yerindəcə həll edib. Daha sonra nümayəndə heyəti tələbələr üçün yaradılmış bütün şəraitlə, o cümlədən, tədris otaqları, Biologiya, Mikrobiologiya, Zoologiya və Biologiya Elmi Tədqiqat laboratoriyaları ilə yerində tanış olub.
Qeyd edək ki, Gəncə Dövlət Universiteti və Türkiyə Respublikasının Dokuz Eylül Universiteti arasında imzalanmış müqaviləyə uyğun olaraq 2023/2024 tədris ilindən etibarən ikili diplom proqramı çərçivəsində Biologiya ixtisası üzrə mütəxəssis hazırlığına başlanılıb. 2025/2026 tədris ilindən etibarən hazırda ikinci kursda oxuyan tələbələr təhsillərini üçüncü və dördüncü kursda Gəncə Dövlət Universitetində davam etdirəcəkdir.
Daha sonra GDU-nun rektoru Yusif Yusibov, Ümumi İşlər üzrə prorektor Samir Məmmədov, İnnovasiyalar Departamentinin direktoru Vasif Həsənov və Kimya-biologiya fakültəsinin dekanı İsfəndiyar Alverdiyev dahi Azərbaycan şairi Nizami Gəncəvinin adına mühazirə zalında olublar. GDU-nun nümayəndə heyəti Türkiyəli tələbələrə təqdim olunub, Gəncə Dövlət Universitetinin Dokuz Eylül Universiteti ilə elmi əməkdaşlıq əlaqələri haqqında danışılıb. Nizami Gəncəvi adına mühazirə otağının məhz GDU ilə Dokuz Eylül Universiteti arasında əməkdaşlıq çərçivəsində yaradıldığı bildirilib. Bununla yanaşı qarşılıqlı olaraq Gəncə Dövlət Universitetində Türk dünyasının görkəmli şəxsiyyəti Yunus Əmrə adına mühazirə otağının olması barədə məlumat verilib.
Görüşdə rektor Yusif Yusibov Azərbaycan və Türkiyə arasında bütün sahələrdə olduğu kimi, elm, təhsil sahəsində də əməkdaşlığın yüksək səviyyədə qurulmasından danışıb, tələbələrə uğurlar arzulayıb.
