Suriya prezidenti Bəşər Əsəd Dəməşqdən təxliyə edilməzdən bir neçə saat əvvəl, dekabrın 7-də Müdafiə Nazirliyinin binasında 30-a yaxın ordu və təhlükəsizlik xidmətinin rəhbərləri ilə görüş keçirərək, hərbçilərə mövqelərini qorumağı tapşırıb.
XALQ.AZ xəbər verir ki, bu barədə “Reuters” mənbələrə istinadən məlumat yayıb.
Nəşr qeyd edir ki, iclasda Əsəd orduya ciddi döyüş vəziyyəti olsa da, mövqelərini tərk etməmələrini bildirib.
Lakin, o, bu çağırışlara baxmayaraq hərbi qüvvələrin artıq zəifləmiş olduğunu və ordunun böyük hissəsinin dağılmağa başladığını çox yaxşı bilirdi.
“Reuters”in məlumatına görə, Əsəd öz administrasiyasının rəhbərinə gündəlik işlərini bitirdikdən sonra evə qayıdacağını bildirib. Lakin vəziyyətin gərginliyi və qarşıdan gələn təhlükə səbəbindən, Əsəd evə getmək əvəzinə gizli şəkildə Dəməşq hava limanına yola düşüb.
Həmin vaxt onun Suriya ərazisindən təxliyə edilməsi artıq planlaşdırılmışdı.
Əsəd həmçinin çıxış hazırlamaq üçün media məsləhətçisinə zəng edərək, onu öz evinə çağırıb. Media məsləhətçisi gəldikdə, Əsədin iqamətgahda olmadığı məlum olub. Əvvəllər isə Əsədin xalqa müraciət edəcəyi barədə açıqlamalar verilmişdi.
Amerika KİV-lərinin məlumatına görə, Əsədin təxliyə əməliyyatı Rusiya xüsusi xidmət orqanları tərəfindən sürətlə və təcili şəkildə həyata keçirilib. Bu, Suriya prezidentinin hakimiyyətinin çöküşünün qaçılmaz olduğunu anladıqları andan baş verib. Rusiya Əsədin ölkəni tərk etməsinə kömək etməklə, öz müttəfiqini qorumağa çalışıb. Çünki rejiminin çöküşü yalnız Suriya üçün deyil, həm də Rusiya üçün böyük strateji itki olacaqdı.
