Reuters xəbər verir ki, Böyük Britaniya 20 gəmiyə sanksiya tətbiq edib,
Britaniya hökumətinin qeyd etdiyi kimi, bu gəmilərdən Rusiya neft ticarətinə qarşı sanksiyalardan yayınmaq üçün istifadə olunur.
“Rusiya Prezidenti Vladimir Putinin neft gəlirləri onun qeyri-qanuni müharibəsinin alovunu davam etdirmək üçün yanacaq kimi xidmət etdiyi halda, ukraynalı ailələr soyuq, qaranlıq gecələrə dözür, tez-tez istilik, işıq və elektrik enerjisi olmadan və aramsız Rusiya raketlərinə məruz qalırlar.",-deyə Böyük Britaniyanın Baş naziri Keir Starmer deyib.
Böyük Britaniya hökuməti bildirib ki, sanksiyalar siyahısına daxil edilən gəmilər arasında bu il 4 milyon bareldən çox Rusiya nefti daşıyan Ocean Faye, Andaman Skies və Mianzimu var. Görülən tədbirlər onların hərəkətini və bir sıra Britaniya limanlarına çıxışını məhdudlaşdırmaq və ya tamamilə aradan qaldırmaq üçün nəzərdə tutulub.
Sinqapur və Dubayda qeydiyyatdan keçmiş 2Rivers və Coral Energy şirkətləri də məhdudiyyətlərə məruz qalıb. Britaniya tərəfinin məlumatına görə, bu şirkətlər Rusiyanın enerji sektoru ilə bağlı fəaliyyətlər həyata keçirib.
Sanksiyalarla yanaşı, Böyük Britaniya Ukraynaya 35 milyon funt sterlinq həcmində yeni yardım tranşı ayırır. Vəsait ölkənin enerji sistemini bərpa etmək və qışda Ukrayna vətəndaşlarına dəstək olmaq üçün nəzərdə tutulub.
Dekabrın 16-da Aİ xarici işlər nazirləri Rusiyaya qarşı 15-ci sanksiyalar paketini təsdiqləyib. Məhdudiyyətlər Rusiya yanacağı daşıyan 52 tankerə təsir edib və bu, Moskvaya G7 ölkələri və onların tərəfdaşları tərəfindən müəyyən edilmiş neft qiymətlərinin yuxarı hədlərini keçməsinə kömək edib. Rusiya hərbi texnikası və oğurlanmış Ukrayna taxılının daşınması ilə məşğul olan gəmilər də sanksiyalara məruz qalıb. Ümumilikdə, dekabrın ortalarına olan məlumata görə, Böyük Britaniya, ABŞ və Aİ-nin qara siyahısında Rusiya neftinin daşınmasında iştirak edən 106 tanker olub. Bloomberg yazır ki, sanksiyalar sayəsində onlardan 68-i, o cümlədən Kazan, Liqovski prospekti və Kareliya keçən ilin oktyabr ayından bəri fəaliyyətsizdir.
Britaniya sanksiyaları çərşənbə axşamı Ukrayna prezidenti Vladimir Zelenskinin müttəfiqlərini Rusiyanın kölgə donanmasına qarşı sanksiyalar tətbiq etməyə çağırdığı vaxta təsadüf edir. Zelenski bazar günü Qara dənizdə Rusiya tankerinin səbəb olduğu neft sızmasını şərh edərək, bunu “ekoloji fəlakət” adlandırıb.
Zelenski vurğulayıb ki, Rusiya kölgə donanmasının hərəkətlərinə məhdudiyyətlər “təkcə sanksiyalarla deyil, həm də digər vasitələrlə” həyata keçirilməlidir. “Bu donanma ən böyük təhlükələrdən biridir. "Putin bu tankerlərdən öz müharibəsini maliyyələşdirmək üçün istifadə edir və bu gəmilərin əksəriyyəti köhnədir, pis təmirlidir və heç bir nəzarət olmadan işləyir", - deyə Ukrayna prezidenti bildirib.
Nigar
