“Mançester Yunayted”in ingilis sol cinah hücumçusu Markus Raşford “qırmızı şeytanlar”ın düşərgəsindən mümkün gedişi haqda danışıb.
Arena.az xatırladır ki, daha əvvəl mətbuatda, “Mançester Yunayted”in Raşfordu satmağa hazır olduğu barədə məlumat yayılıb.
“Şəxsən mən yeni çağırışa və növbəti addımlara hazır olduğumu düşünürəm. Mən gedəndə, umu-küsü olmadan gedəcəyəm. Məndən “Mançester Yunayted”lə bağlı heç bir mənfi rəy almayacaqsınız. Mən belə bir insanam. Vəziyyətin onsuz da pis olduğunu bilirəmsə, daha da pisləşdirmirəm. Mən keçmişdə başqa oyunçuların da necə getdiyini görmüşəm və belə olmaq istəmirəm. Gedəndə açıqlama verəcəyəm və bu mənim adımdan olacaq.
Mən karyeramın yarısındayam. Zirvə anımın indi gələcəyini gözləmirəm. Doqquz ilimi İngiltərə Premyer Liqasında keçirmişəm və bu, mənə çox xüsusları öyrədib, həm oyunçu, həm də bir insan kimi tərəqqimə kömək edib. Ona görə də son doqquz il ərzində heç bir peşmanlıq hissi keçirməmişəm. Gələcəkdə də peşman olmayacağam, çünki hər bir xüsusu günbəgün qəbul edirəm və bəzən pis məqamlar olur, bəzən isə yaxşı anlar yaşanır. Mən sadəcə zərif tarazlığı qorumağa çalışıram. Ən yaxşısı hələ qarşıdadırmı? Yüz faiz. Bu, mənim zehniyyətimdir”.
Markus Raşford “Mançester Yunayted”in yetirməsidir. İngilis futbolçu 2016-cı ilin yanvarından “qırmızı şeytanlar”ın əsas komandasında çıxış edir. Raşfordun “Mançester Yunayted”lə müqaviləsinin müddəti 2028-ci ilin iyun ayının sonuna qədər qüvvədədir.
Raşford cari mövsümdə “qırmızı şeytanlar” üçün bütün yarışlarda 24 oyun keçirib, 7 qol və 3 məhsudlar ötürmə ilə fərqlənib.
Markusun “Mançester Yunayted”in heyətində çıxışının ümumi mənzərəsi isə 426 oyun, 138 qol və 63 məhsuldar ötürmədən ibarətdir.
İngilis hücumçu “Mançester Yunayted”lə Avropa Liqasının (2016/2017), İngiltərə Kubokunun (2016, 2024), İngiltərə Liqa Kubokunun (2017, 2023), İngiltərə Super Kubokunun (2016/2017) qalibi olub. Raşford 2019/2020-ci və 2022/2023-cü illər mövsümlərində “Mançester Yunayted”də ilin futbolçusu seçilib.
Raşford 2016-cı ilin may ayında debüt etdiyi İngiltərə yığma komandasının heyətində 60 oyuna, 17 qol vurub və 6 məhsuldar ötürmə verib.
“Transfermarkt” internet-portalı 27 yaşlı ingilis sol cinah hücumçusunun transfer dəyərini 55 milyon avro məbləğində qiymətləndirir.
