Brüssel, 19 dekabr, AZƏRTAC
“Azərbaycanın trio qrupu milli musiqilərini bütün zənginliyi ilə bizə təqdim etdi. Musiqi alətlərinin bütün imkanlarını, çalarlarını əyani şəkildə göstərdilər. Tarın, kamançanın, eləcə də xanəndənin ifası əsrarəngiz idi”.
Bu fikirləri Azərbaycan musiqi alətlərinin Brüssel Kral İncəsənət və Tarix Muzeyinə təqdim edilməsi mərasimində musiqişünas və Musiqi Alətləri Muzeyinin Qərb nəfəs və zərb alətləri kolleksiyasının kuratoru Geri Dümulən AZƏRTAC-a müsahibəsində deyib. O, konsertin böyük əhəmiyyət daşıdığını qeyd edib. “Baroque and More” təşkilatı haqqında ətraflı məlumat verərək, bu təşkilatın muğam musiqisi ilə maraqlandığını və bu təşkilat sayəsində bu gün möhtəşəm muğamı dinlədiklərindən məmnun olduqlarını bildirib. Azərbaycan milli musiqi alətlərinin Brüssel Kral İncəsənət və Tarix Muzeyinin kolleksiyasını zənginləşdirdiyini diqqətə çatdırıb.
