Avropada yeni avtomobil satışları oktyabr ayında zəif artımdan sonra noyabr ayında yenidən azalma ilə üzləşib. Bu, Fransada və İtaliyada kəskin azalmalara, eləcə də Almaniyada durğunluğa görə baş verib.
NOCOMMENT.az bu barədə Avropa Avtomobil İstehsalçıları Assosiasiyasının (“ACEA”) məlumatlarına istinadən xəbər verir.
Elektrik avtomobillərinin satışlarındakı yavaşlama, hibrid-elektrik avtomobillərin qeydiyyatındakı artım hesabına qismən kompensasiya edilib. Hibrid-elektrik avtomobillərin qeydiyyatı artıq üçüncü ay ardıcıl olaraq benzin mühərrikli avtomobillərin qeydiyyatını üstələyib.
Əhəmiyyəti
Avropa avtomobil istehsalçıları zəif tələbat, yüksək istehsal xərcləri və elektromobillərə keçidi idarə etməkdə çətinliklərlə üzləşirlər. Bununla yanaşı, onlar Çinlə rəqabət aparmağa çalışırlar.
Rəqəmlər
Noyabr ayında Avropa İttifaqında (“Aİ”), Britaniyada və Avropa Azad Ticarət Assosiasiyasına (“EFTA”) üzv ölkələrdə yeni avtomobil qeydiyyatlarının sayı illik müqayisədə 2% azalaraq 1,06 milyona düşüb.
-
- Markalar üzrə, “Aİ”, Britaniya və “EFTA” ölkələrində “Volkswagen” qeydiyyatları 2,8%, “Renault” qeydiyyatları isə 9,2% artıb. Buna qarşı, “Stellantis” qeydiyyatları 10,8% azalıb.
- “Aİ”də tam elektrik avtomobillərinin satışları 9,5% azalıb ki, bu da əsasən Fransada və Almaniyada kəskin azalmalara bağlıdır. Eyni zamanda, hibrid avtomobillərin satışları 18,5% artıb və ardıcıl üçüncü ay müsbət dinamika göstərib.
- Çində istehsal olunan avtomobillərə tətbiq edilən yeni “Aİ” tarifləri səbəbindən “Tesla” və “SAIC Motor” satışları müvafiq olaraq 40,9% və 7,8% azalıb.
- “Aİ”də noyabr ayında satılan elektrikləşdirilmiş avtomobillər ümumi sərnişin avtomobili qeydiyyatlarının 55,8%-ni təşkil edib. Bu göstərici keçən ilin müvafiq dövründə 51,8% idi.
Şərhlər
“Aİ”nin karbon dioksid emissiyasının azaldılması üzrə yeni hədəflərinin gələn il qüvvəyə minməsi ilə bağlı olaraq, “ACEA” qaydaların yenidən nəzərdən keçirilməsinin vacib olduğunu vurğulayıb və bu barədə “Aİ” qanunvericiləri ilə müzakirələr apardığını bildirib.
“Keçid kağız üzərində planlaşdırılıb. Kağızda hər şey mükəmməl görünə bilər, amma reallıq fərqlidir”, – deyə “ACEA”nın baş direktoru Siqrid de Vries (“Sigrid de Vries”) “Reuters” agentliyinə bildirib.
“Avropada bir neçə problemimiz var. Bizdə çox baha enerji və elektrik qiymətləri mövcuddur. Avropanın özündə elektrikləşmə üçün lazım olan xammal və təchizat zəncirinə hələ malik deyilik”, – deyə o əlavə edib.
