İpoteka və Kredit Zəmanət Fondu tərəfindən keçirilən tender müsabiqəsinin qalibi məlum olub.
NOCOMMENT.az Yeniavaz.com–a istinadən bildirir ki, dəyəri 138 milyon 800 min 96 manat olan tender müsabiqəsinin qalibi “Körpü-Bina-Tikinti” MMC (VÖEN- 3100026151) olub.
Qeyd edək ki, tenderin qalibi olan “Körpü-Bina-Tikinti” MMC İpoteka və Kredit Zəmanət Fonduna yaşayış sahələri satacaq.
Bildirilir ki, satın alınacaq yaşayış sahələri Bakı şəhərinin 7-ci və 8-ci zonalarında, eyni binada və ya bina kompleksində yerləşəcək. Ümumi sahəsi 40 000 kv. metr olacaq 1,2,3, və 4 otaqlı mənzillərin sayı 520 olacaq.
Açıqlanan məlumatlardan belə görünür ki, İpoteka və Kredit Zəmanət Fondunun satın alacağı bir mənzil üçün ödəyəcəyi orta məbləğ 266 min 923 manat olacaq. Bundan başqa, mənzilin bir kv. metrinin qiyməti 3 min 470 manat təşkil edəcək.
Məlumat üçün bildirək ki, 138,8 milyon manatlıq tenderin qalibi olan “Körpü-Bina-Tikinti” MMC 17 sentyabr 2001-ci ildə dövlət qeydiyyatına alınıb.
Nizamnamə kapitalı 300 min manat olan “Körpü-Bina-Tikinti” MMC-nin hüquqi ünvanı Nərimanov rayonu, Əhməd Rəcəbli 2, ev 1-də yerləşir. MMC-nin qanuni təmsilçisi Göyüşov Xaliq Avdil oğludur.
“Körpü-Bina-Tikinti” MMC əsasən dövlət qurumlarının keçirdiyi iri həcmli layihələrin icraçısı kimi tanınıb. Rəsmi sənədlərdə şirkətin qanuni təmsilçisi Göyüşov Xaliq Avdil oğlu qeyd olunsa da, şirkətə tanınmış iş adamı Xəlil Göyüşovun rəhbərlik etdiyi bildirilir.
Şirkətin adı sonuncu dəfə bu ilin oktyabr ayında Sabunçu rayonu ərazində baş verən və 2 nəfərin ölümü ilə nəticələnən hadisədə hallanıb. Bildiyimiz kimi, 22 oktyabr tarixində Sabunçu rayonu Asəf Əsədullayev küçəsində yerləşən tuneli su basdığı üşün 2 nəfər həyatını itirib. Daha sonra məlum olub ki, bu tunel 2019-cu ildə “Azərbaycan Dəmir Yolları”nın sifarişi əsasında “Körpü Bina Tikinti” MMC tərəfindən inşa edilib.
