Azərbaycan hökuməti Fələstində 600 şagird yerlik məktəbin inşası üçün vəsait ayırıb.
Musavat.com xəbər verir ki, bu barədə baş nazir Əli Əsədov Qahirədə keçirilən İqtisadi Əməkdaşlıq Təşkilatı D-8-in 11-ci sammiti çərçivəsində “Fələstin və Livandakı vəziyyət” mövzusunda keçirilən sessiyada çıxışı zamanı bildirib.
Əli Əsədov vurğulayıb: “Daha çox qan axıdılmasının qarşısını almaq üçün təcili tədbirlər görülməlidir. Azərbaycan İslam dünyasının ayrılmaz hissəsi olaraq, bu çətin dövrdə Qəzza sakinləri ilə həmrəyliyini ifadə edir. Biz zorakılığın eskalasiyasını, gücün qeyri-proporsional tətbiqini və mülki şəxslərin ölümünü qətiyyətlə pisləyirik. Bu, beynəlxalq humanitar hüququn açıq şəkildə pozulmasıdır. Azərbaycan həmişə Fələstin xalqına maliyyə yardımı göstərmək üçün səylər göstərib.”
Baş nazir əlavə edib ki, Azərbaycan Fələstindəki böhran nəticəsində zərər çəkmiş xalqa humanitar yardım məqsədilə 2 milyon ABŞ dolları ayırıb.
Bu humanitar təşəbbüs Azərbaycan xalqının Fələstin xalqına dəstəyini bir daha təsdiq edir.
Musavat.com
