"Lukoil"də benzinə su qatılır iddiası: Şirkətdən rəsmi reaksiya — VİDEO (YENİLƏNDİ)

Məsələ ilə bağlı "Lukoil-Azərbaycan" QSC-nin əməkdaşı Rahil Ağayev Oxu.Az-a açıqlamasında faktı təsdiqləyib.

O, qeyd edib ki, yaranmış problemlə bağlı ilk şikayət dekabrın 18-də daxil olub.

"Təəssüf ki, belə bir hadisə baş verib. ... hadisənin baş verməsinə texniki qəza səbəb olub.

Hadisə sosial şəbəkələrdə deyildiyi kimi "Şamaxinka" ərazisindəki YDM-də yox, Azadlıq prospektində hamının "Qoşa yanacaqdoldurma məntəqəsi" kimi tanıdığı ərazidə baş verib.

Deməli, yağan yağışlarla əlaqədar çənin birində qəza olub, çən deşilib və içinə qrunt suları axıb. Aİ-95 markalı yanacaq da məhdud olduğuna görə həmin vaxt orada olan operatorun təcrübəsizliyindən dibinə su çökən çən tam olaraq doldurulub (? - red.). Yəni bilərəkdən heç kim yanacağa su qatmayıb. 

... Hazırda araşdırmalarımız davam edir. Bu günə kimi bizə 20 nəfər müraciət edib və onların hər birinə kompensasiya ödənilib".

Saat:23:21, 21 dekabr, 2024:

Bu gün sosial şəbəkələrdə "Lukoil” yanacaqdoldurma məntəqəsində sürücülərin aldadılması barədə bir neçə video paylaşılıb.

Qaynarimfo-nun verdiyi xəbərə görə,  belə videolardan birini Haldun Novruzzadə paylaşıb:

"Dünən, yəni 20.12.2024-cü il tarixdə saat 21:05-21:30 radələrində bizim "Rent a car" şirkətinə məxsus 99-XN-288 nömrəli "Hyundai Elantra" avtomobili ilə müştəri "Şamaxinka"da yerləşən "Lukoil"dan 20 manatlıq A92 markalı benzin vurub. Maşın 200 metr gedib, sönüb. Gətirmişik ustaya,  çındən benzin yerinə su çıxıb. Bu, konkret biabırçılıqdı. Mənə 500 manat ziyan dəyib,  "Lukoil" deyir ki, biz bakdan analiz götürməliyik. Bu, son 1 ay ərzində bu "Lukoil" yanacaqdoldurma məntəqəsində baş verən 4-5-ci belə hadisədir. "LUKOIL-Azerbaijan"dan tələb edirəm, mənə dəyən ziyanı ödəsin!"