Milad bayramının sehri Nyu-York şəhərini işıqlandırır və şəhərdə ən heyranedici ab-havanı ekstravaqant bayram dekorasiyaları ilə məşhur olan Dayker Hayts məhəlləsində hiss etmək mümkündür. Amerikanın Səsinin müxbiri Aron Ranen bizi bu bayram möcüzələri diyarına aparır.
Bruklinin Dayker Hayts məhəlləsi hər dekabr ayında bayram cənnətinə çevrilir. Küçələri bəzəyən parıltılı işıqlar və möhtəşəm dekorasiyalar bayram mövsümünə aid şən musiqi səsləri ilə müşayiət olunur.
1980-ci illərdə yalnız bir neçə ailənin evlərinin önünü bəzədiyi bu məhəllə Nyu York şəhərinin ən gözəl bayram yerlərindən birinə çevrilib. 40 ildən çoxdur ki, ailələr hər il Dayker Haytsı ziyarət edir və bu, artıq nəsildən nəsilə ötürülən bir ənənəyə çevrilib.
“Bu bizim hər il ailəmizlə birlikdə etdiyimiz bir şeydir. Biz bura gəlib, işıqlara baxırıq,” Nyu York şəhərinin sakini Ancela Ruggiero deyir.
Evlərin önündə quraşdırılan dekorasiyalar arasında klassik Milad səhnələrindən tutmuş Qar adamı Frosti, Qrinç, Minyonlar, və əlbəttə ki, Santa Klaus yer alır.
“Məhəllənin bu qədər gözəl bir şəkildə işıqlandırılmasını görmək çox maraqlıdır. Hamının unikal bir dizaynı var, bu da bu məhəlləyə bir fərdilik qazandırır,” şəhər sakini Stasia Li deyir.
Ailələlər evlərin önündən keçərək, şəkil çəkdirir, dekorasiyalara heyran qalır və bayramın sehrinə dalırlar.
“Mən və yoldaşım oğlumuzu gətirmişik. Bu onun üçün ilk dəfədir. Onun iki yaşı var. Mən özüm Staten Aylenddən olsam da, həmişə Dayker Haytsa gəlib, Milad bayramını qeyd edib və bütün gözəl işıqlara baxmışam," şəhər sakini Frank Osorio deyir.
Küçələri rəngli işıqlarla bəzəyən bu gözəl dekorasiyaların hazırlanması aylarla planlaşdırılır. Onları görməyə həm yerlilər, həm də turistlər gəlir. Onlardan biri xorvatiyalı bu ailədir.
“Məncə çox gözəldir. Düşünürəm ki, burada yaşayan insanlar üçün sakitlik yoxdur, çünki hər gün çox sayda insan gəlir. Amma çox gəşəndgir. Məncə fərqlidir və çox gözəldir,” Davor Yukotiç deyir.
Dayker Hayts insanlara həqiqətən də heyranedici bayram əhval-ruhiyyəsi yaşadır.
visiontv.az
