Prezident Co Bayden səlahiyyətlərinin son həftələrində Rusiyanın enerji sektoruna qarşı yeni sanksiyalar tətbiq etməyi düşünür.
“Cebheinfo.az”-ın məlumatına görə, “Washington Post” qəzeti belə yazıb.
Rəsmi mənbələr bildiriblər ki, sanksiyalar yeni seçilmiş Prezident Donald Trampın administrasiyasına Ukraynaya qarşı müharibəyə son qoymaq üçün Kremllə danışıqlarda daha çox təsir imkanları verə bilər.
Sanksiyaların əsas ideyası Rusiya neftini Qərb blokundan kənar ölkələrə daşıyan beynəlxalq gəmilərdən ibarət “kölgə donanması” adlanan gəmiləri, həmçinin əvvəllər sanksiyalara məruz qalmamış Rusiya neft ixracatçılarını hədəf almaqdır.
Nəzərdən keçirilən digər variantlar arasında banklara Rusiyanın enerji sektoru ilə bağlı əməliyyatlar həyata keçirməyə icazə verən lisenziyaların ləğvi də var.
Əgər bu tədbirlər həyata keçirilərsə, Trampın andiçmə mərasimindən əvvəl Baydenin iqtisadi və xarici siyasət irsini formalaşdıra bilər.
Vəzifədən gedişi ərəfəsində Baydenin Rusiyaya qarşı böyük bir addımı onun 2022-ci ildə Rusiyanın Ukraynaya müdaxiləsinə qarşı Qərb müttəfiqlərini qəti cavab verməyə ruhlandırdığına dair iddiaları gücləndirəcək.
Eyni zamanda, Bayden varisinə sağlam iqtisadiyyatı təhvil vermək istəyir, buna öz prezidentliyinin əvvəlində müşahidə edilən enerji şoku və qiymət artımlarının təkrarlanması mane ola bilər.
“Yeni böyük sanksiyaların məqsədi altı-on iki ay ərzində Rusiyanın ixrac gəlirlərini iki rəqəmli azaltmaq olmalıdır”- Bayden administrasiyasının beynəlxalq iqtisadiyyat üzrə keçmiş baş direktoru Peter Harrel belə deyib.
Bayden administrasiyasının adının çəkilməsini istəməyən yüksək rütbəli rəsmisi bildirib ki, bu tədbirlər Ukraynaya ədalətli şərtlərlə sülhü müdafiə etmək və danışıqlar aparmaq üçün “ən yaxşı fürsət”i təmininə görə lazımdır.
