İspaniya Kral Kubokunun 1/16 finalında “Marbelya”ya qarşı oyunda 1:0 hesablı qələbə Madrid “Atletiko”su üçün əlamətdar olub.
Arena.az “Opta Sports” statistik internet-portalına istinadən məlumat verir ki, “döşəkçilər” ardıcıl qələbələrin sayına görə klub rekordunu təkrarlayıblar.
Beləliklə, argentinalı mütəxəssis Dieqo Simeonenin yetirmələri bütün yarışlar çərçivəsində ardıcıl 13 qələbəni sıralayıblar. İspaniya La Liqasında ardıcıl 7 qələbə qazanmış “döşəkçilər” İspaniya Kral Kubokunun və UEFA Çempionlar Liqasının Liqa mərhələsinin hər birində 3 qələbə qazanıblar.
Xatırladaq ki, Madrid “Atletiko”su 2012-ci ilin avqust ayından oktyabr ayına qədər 13 oyundan ibarət ardıcıl qələbələri sıralayıb. Bu nailiyyət də Dieqo Simeonenin rəhbərliyi altında gerçəkləşib.
Cari mövsümdə keçirdiyi 18 oyunda 41 xal toplamış “Atletiko” İspaniya La Liqasının yarış cədvəlinin 2-ci pilləsində qərarlaşıb. Komanda hazırda mümkün lider qismindədir. Döşəkçilər 19 oyundan 43 xalla zirvədə qərarlaşmış “Real”a münasibətdə nəzəri üstünlük saxlayırlar.
