"Oyundan əvvəl danışmaq çətindir. Bizi mühüm qarşılaşma gözləyir".
Bunu "Zirə"nin baş məşqçisi Rəşad Sadıqov Bakıda Xorvatiyanın "Osiyek" komandasına qarşı keçirəcəkləri UEFA Konfrans Liqasının III təsnifat mərhələsinin cavab oyunundan əvvəl mətbuat konfransında deyib.
Mütəxəssis meydanda gərgin mübarizənin olacağını bildirib:
"Hər iki komandada yaxşı futbolçular var. Əlimizdən gələni etməyə çalışacağıq. Meydanın ot örtüyünün yaxşı vəziyyətdə olmaması bizi məyus edir. Bu, texnikalı oyuna mane ola bilər. Şərtlər hər iki tərəf üçün eynidir".
Rəşad Sadıqov həmçinin "Qarabağ"ı UEFA Çempionlar Liqasında pley-off mərhələsinə yüksəlməsi münasibəti ilə təbrik edib:
"Dünənki qələbə bizə motivasiya verə bilər. Sabahkı görüşdə həm özümüzə, həm də "Sabah"a uğurlar arzulayıram. Hər iki kollektiv mərhələ adlasa, yeni tarix yazılacaq və Azərbaycanın üç təmsilçisi avrokubokların pley-offunda mübarizə aparacaq. Rəqibin möhkəm kollektiv olduğunu da anlayırıq. Mövsümə uğurla başlamaq bizə xüsusi üstünlük vermir".
Qeyd edək ki, avqustun 15-də “Liv Bona Dea Arena”da keçiriləcək qarşılaşma Bakı vaxtı ilə saat 20:30-da start götürəcək. Səfərdəki görüşdə 1:1-lik heç-heçə qeydə alınıb.
