Mütəxəssislərin dəfələrlə izlənilən məzmunun gənclərə zərərli təsir göstərə biləcəyi barədə xəbərdarlıqlarından sonra "YouTube"-da yeni qadağalar başlayıb.
Belə ki, 13-17 yaşlı gənclərə bədən çəkisini və ya fiziki xüsusiyyətlərini ideallaşdıran videoların tövsiyə edilməsi praktikasına son qoyulur.
"Cebheinfo.az" xəbər verir ki, yeni təlimatlara əsasən, "YouTube"-un alqoritmləri gənc istifadəçiləri bu cür məzmuna yönəltməkdən çəkindirəcək. Şirkət bəyan edib ki, bu məzmunlar qaydaları pozmur, lakin təkrar baxılması bəzi istifadəçilərin sağlamlığına təsir edə bilər.
Potensial zərərli məzmun kateqoriyalarını müəyyən edərkən "YouTube" fiziki xüsusiyyətləri ideallaşdıran gözəllik proqramları, müəyyən bədən görünüşünü təşviq edən məşq qaydalarını və sosial aqressiyanı təşviq edən mövzuları hədəfləyib. Şirkət Böyük Britaniyada və bütün dünyada yeni təlimatlar çərçivəsində bu cür məzmunun gənc istifadəçilərə tövsiyə edilməyəcəyini açıqlayıb.
"YouTube" bu təhlükəsizlik çərçivəsinin daha əvvəl ABŞ-də tətbiq edildiyini və oxşar tədbirlərin İngiltərədə də həyata keçirildiyini bildirib. Onlayn Təhlükəsizlik Aktı texnoloji şirkətlərdən uşaqları zərərli məzmundan qorumağı tələb edib.
