Bakı, 6 sentyabr, AZƏRTAC
Çin hökuməti beynəlxalq övladlığa götürmə proqramına son qoyur, ABŞ isə bu qərarın ərizələri baxılmaqda olan yüzlərlə amerikalı ailəyə necə təsir edəcəyinə aydınlıq gətirmək istəyir.
AZƏRTAC xəbər verir ki, Çin Xarici İşlər Nazirliyinin nümayəndəsi Mao Nin cümə axşamı gündəlik brifinqdə bildirib ki, qan qohumlarının uşağı və ya ögey oğulu övladlığa götürə biləcəyi hallar istisna olmaqla, Pekin artıq Çindən uşaqların beynəlxalq övladlığa götürülməsinə icazə vermir.
Mao qərarın müvafiq beynəlxalq konvensiyaların ruhuna uyğun olduğunu söyləməkdən başqa izahat verməyib, - deyə “The Guardian” yazır. “Biz çinli uşaqları övladlığa götürmək istəyən xarici hökumətlərə və ailələrə yaxşı niyyətlərinə və göstərdikləri sevgi və xeyirxahlığa görə minnətdarlığımızı bildiririk”, - deyə o əlavə edib.
Çindəki ABŞ diplomatları ilə telefon danışığında Pekin rəsmisi istisna hallardan başqa, heç bir mərhələdə bu işlərə baxılmayacağını bildirib.
Amerikalı ailələr Çindən 82 674 uşaq övladlığa götürüblər ki, bu da istənilən digər ölkə ilə müqayisədə ən yüksək göstəricidir.
Beynəlxalq övladlığa götürmə əsasən COVID pandemiyası səbəbindən 2020-ci ildən dayandırılmışdı, Çində siyasi, demoqrafik və iqtisadi vəziyyətdəki dəyişikliklər bu sektorda bir çoxunun övladlığa götürmə siyasətinin ləğv ediləcəyini və ya sərtləşdirilməsini gözləməsinə səbəb olub.
Çində yeni doğulanların sayı 2023-cü ildə 9,02 milyona düşüb, əhalinin ümumi sayı isə iki il ardıcıl azalır. Daha çox doğumların təşviqinə yönəlmiş bir sıra hökumət tədbirləri fonunda uşaqların, xüsusən də qızların övladlığa götürülməsində əsas amil olan Çinin onilliklər boyu davam edən “bir ailə, bir uşaq” siyasəti tədricən ləğv edilib.
