Sentyabrın 12-də Bakı Apellyasiya Məhkəməsində (BAM) talış tədqiqatçı İqbal Əbilovun şikayətinə baxılıb. O, ev dustaqlığına keçirilməsindən imtina ilə bağlı şikayət vermişdi.
Müdafiə tərəfi Əbilovun özünü təqsirli hesab etmədiyini, istintaqdan gizlənmək üçün səbəbi olmadığını qeyd edərək, onun barəsində qətimkan tədbirinin dəyişdirilməsi haqqında vəsatət verib. Eyni zamanda, onun istintaqa məlum olan daimi yaşayış yeri var və ilk çağırışda istintaqa gəlməyə hazırdır.
Avqustun 31-də Səbail Rayon Məhkəməsi onun ev dustaqlığına keçirilməsi haqqında vəsatəti təmin etməyib, sentyabrın 12-də isə Apellyasiya Məhkəməsi bu qərarı təsdiq edib, bu barədə jurnalistlərə vəkil Fariz Namazlı bildirib.
Onun sözlərinə görə, məhkəmənin qətimkan tədbirlərinə dair qərarları üzrə Apellyasiya Məhkəməsi ən yuxarı instansiyadır. Lakin gələcəkdə müdafiə tərəfi həbsin qanunsuzluğundan Avropa İnsan Hüquqları Məhkəməsinə şikayət verə bilər.
Əbilovu dəstəkləmək üçün bir qrup fəal məhkəmə binasının qarşısına gəlib. Əbilovu gətirən avtomobil məhkəmənin həyətinə girərkən və çıxarkən fəallar "İqbal, səninləyik!" şüarı səsləndiriblər.
* İqbal Əbilov iyulun 22-də Azərbaycana qohumlarının yanına gəldikdə saxlanılıb. Ona qarşı 274 (dövlətə xəyanət), 281.3 (dövlətçiliyə qarşı yönəlmiş açıq çağırışlar, xarici təşkilatların və ya onların nümayəndələrinin tapşırığı ilə törədildikdə) və 283.1-ci (milli, irqi, sosial və dini nifrət və düşmənçiliyin salınması) maddələri ilə ittiham irəli sürülüb.
Xüsusən, bütün bu cinayətlərin Ermənistan xüsusi xidmətlərinin göstərişi ilə törədildiyi iddia olunur. Əbilov ittihamları təkzib edir və müstəsna olaraq elmi fəaliyyətlə məşğul olduğunu bildirir.
Dünyanın müxtəlif ölkələrinin alimlərindən ibarət böyük bir qrup Əbilovun azad edilməsinə köməklik göstərmək xahişi ilə Azərbaycan rəhbərliyinə müraciət edib.
