Bakı, 13 sentyabr, AZƏRTAC
Berlindəki Neues Muzeyinin zalında minlərlə ziyarətçinin diqqətini cəlb etməyə davam edən qədim Misir kraliçası Nefertitinin möhtəşəm boyalı büstü dayanır. AZƏRTAC “Əl Əhram” qəzetinə istinadla xəbər verir ki, Misir hökuməti bu qiymətli artefaktı Almaniyadan geri qaytarmaq uğrunda mübarizə aparır.
Arxeoloji qrup tərəfindən firon Axenatonun paytaxtı Amarna şəhərindəki qədim Misir saray heykəltəraşı Tutmosun emalatxanasında alman misirşünas Lüdviq Borçardt tərəfindən aşkar edildiyi gündən ötən 102 il ərzində bu büst dünyada gözəllik simvoluna çevrilib.
Büst qədim Misir sənətinin ən simvolik artefaktlarından biridir və adı “gözəl gəldi” mənasını verən kraliça Nefertitinin üzərindəki boyunbağının canlı rəngləri ilə bəzədilmiş zərif, uzun boynu və sepiya tonuna zidd olan hündür, mavi yastı tacı təsvir edir. Büstün kristal gözlərindən biri olmasa da, həm göz qapaqları, həm də qaşlar ona xüsusi gözəllik verir.
Hazırda Misirdə bu artefaktın vətənə qaytarılması kampaniyası davam etdirilir. Repatriasiya cəhdləri ciddi şəkildə 2005-ci ildə başlayıb və bu məqsədlə vasitəçilik etmək üçün UNESCO-ya müraciət olunub. 2012-ci ildə Almaniyanın mədəniyyət naziri Bernd Nyumann bu tələbi rədd edib və ekspertlərin guya büstün uzun səfərə aparıla bilməyəcəyi barədə rəyini bəhanə gətirib.
Yeni başlayan kampaniya çərçivəsində artefaktın Misirə qaytarılacağı ehtimalı daha da artıb.
