Amerikanın “OpenAI” şirkəti mühakimə yürütməyə qadir olan “o1” süni intellekt modelləri xətti hazırlayıb.
İqtisadiyyat.az xəbər verir ki, bu barədə “Financial Times” şirkətin press-relizinə istinadən yazır.
“Yeni modellər əvvəlkilərdən daha mürəkkəb elmi və proqramlaşdırma problemlərini həll edə bilər, lakin onlara cavab vermək üçün daha uzun vaxt tələb olunur. Öyrəndikcə onlar düşüncə proseslərini təkmilləşdirir, müxtəlif strategiyaları sınayır və səhvlərini tanıyırlar”, - məlumatda qeyd olunub.
Bildirilib ki,”o1”lər hüceyrə ardıcıllığı məlumatlarını təhlil etmək, kvant optikası üçün mürəkkəb riyazi düsturlar yazmaq və çox addımlı iş axınlarını proqramlaşdırmaq və icra etmək üçün istifadə edilə bilər.
OpenAI-nin baş texnologiya direktoru Mira Muratinin sözlərinə görə, yeni modellər həm də süni intellektin işini başa düşmək üçün imkanlar açır: "Biz modelin necə düşündüyü barədə bir fikir əldə edirik ... düşüncə prosesini addım-addım müşahidə edə bilərik".
İlk sınaq modeli artıq ChatGPT chatbotuna və tətbiq proqramlaşdırma interfeysinə (API) inteqrasiya olunub. Bu model hələ ChatGPT-də olan bir çox xüsusiyyətlərə, o cümlədən internetdə məlumat axtarmaq və faylları yükləmək imkanına malik olmasa da, şirkət onu müntəzəm olaraq yeniləməyi və təkmilləşdirməyi planlaşdırır.
