Azərbaycan Respublikasının Prezidenti İlham Əliyev ölkə vətəndaşlarına müraciətində belə bir fikir səsləndirmişdi. "2020-ci ildə İkinci Qarabağ Müharibəsi başa çatanda bizim bayrağımız Şuşada və azad edilmiş digər ərazilərdə qaldırılanda biz hamımız yaxşı bilirdik ki, işimiz yarımçıq qalıb. Azərbaycan öz dövlət suverenliyini tam bərpa etməli idi və bunu etdi". Dövlət başçısının çıxışından da aydın görünür ki, suverenliyimizin bərpası üçün əməliyyatların həyata keçirilməsi zamanın tələbi idi. 24 saatdan az müddətdə həyata keçirilən antiterror tədbirləri nəticəsində 2023-cü il sentyabrın 28-də Qarabağın separatçı və qondarma rejiminin "rəhbəri" Samvel Şahramanyan qondarma rejimin ləğvi ilə bağlı sənədi imzaladı. Bununla da Azərbaycan ərazisində qanunsuz yerləşən Ermənistan ordusu tam şəkildə tərksilah edilərək, ölkəni tərk etdi. Qarabağda qeyri-qanuni xunta rejimi ləğv edildi, separatçıların əsas rəhbərləri həbs edildi və Azərbaycan öz dövlət suverenliyini tam təmin etdi. Azərbaycanın Zəfər tarixi Xankəndi, Xocalı, Ağdərə, Xocavənd, Əsgəranda üçrəngli Bayrağımızın yüksəldilməsi, ərazi bütövlüyümüzün və suverenliyimizin tam bərpası ilə nəticələndi.
Suverenliyimizin bərpasından ötən bir ildə müstəqillik tariximizdə ilk dəfə olaraq bütün ölkə ərazisini əhatə edən seçkilərin keçirilməsi, işgaldan azad olunan ərazilərdə olan seçici fəallığı qürurvericidir.
Prezident İlham Əliyevin qeyd etdiyi kimi, İkinci Dünya müharibəsi ilə bugünkü müharibələri müqayisə etmək belə mümkün deyil və təbii ki, bir çox ölkələr bu gün hərbi sahəyə diqqət yetirməyə başlamışlar. Azərbaycan isə bunu artıq 20 ildən çoxdur ki, edir. Ölkəmizin əldə etdiyi döyüş təcrübəsi əvəzolunmazdır. Ordumuz təlimlərdə, paradlarda yox, döyüş meydanında öz gücünü göstərmişdir. Ermənistan və ona hərbi cəhətdən dəstək verənlər bilməlidirlər ki, bizi heç nə dayandıra bilməz. Əgər bizə qarşı ərazi iddialarına son qoyulmazsa, əgər Ermənistan öz qanunvericiliyini normal qaydaya salmazsa, təbii ki, sülh müqaviləsi olmayacaq.
Aradan keçən müddət ərzində suveren Azərbaycan 30 ildə düşmən tapdağında olan ərazilərdə geniş quruculuq-abadlıq işlər həyata keçirir. İşgaldan azad olan ərazilərə köç karvanları yola salınır.
Mətanət Səfərli
YAP Nəsimi Rayon Təşkilatının əməkdaşı
