“Əl-Nəsr”in portuqaliyalı hücumçusu Kristiano Ronaldo “Barselona”nın ispan yeniyetmə vingeri Lamin Yamal haqda danışıb.
Arena.az ulduz futbolçunun yeniyetmə həmkarı barədə fikrini təqdim edir:
“Yığma komanda Yamala çox kömək edib. O, çox yaxşı idi. Düşünürəm ki, onun böyük imkanı var. Görək, nəyə nail olacaq. Amma çoxuna nail olacağına inanıram”, deyə Kristiano Ronaldo vurğulayıb.
İspaniya yığmasının sabiq hücumçusu David Vilya isə Lamin Yamalın argentinalı ulduz hücumçu Lionel Messi ilə müqayisə edilməsinə münasibətini açıqlayıb:
“Lamin xüsusi oyunçudur, müstəsnadır, biz əvvəllər belə birini görməmişdik. Məsələ onun gənc olmasında və yaşına görə erkən yetkinliyində deyil, amma mən dəfələrlə demişəm ki, oyunçuları Messi ilə müqayisə etmək səhvdir. Bu, istənilən futbolçuya aiddir, istər Laminə, istər Halanda, istərsə də Mbappeyə…
Onu Messi ilə müqayisə etmək olmaz, çünki Lionel hamıdan fərqlidir. Amma bu adamın etdikləri bizi elə düşündürür ki, onun hüdudunun harada olduğunu bilmirik”, deyə Vilya fikrini əsaslandırıb.
Lamin Yamal “Barselona”nın yetirməsidir. İstedadlı yeniyetmə 2022/2023-cü illər mövsümündən Kataloniya təmsilçisinin əsas komandasında çıxış edir. Yamalın “Barselona” ilə müqaviləsi 2026-cı ilin iyun ayının sonuna qədər qüvvədədir.
Cari mövsümdə Yamal “blauqrana”nın heyətində bütün yarışlarda 5 oyuna 4 qol və 4 məhsuldar ötürmə ilə fərqlənib.
Yamalın “Barselona”da çıxışının ümumi mənzərəsi 56 oyun, 10 qol və 13 məhsuldar ötürmədən ibarətdir.
Yamal 2023-cü ilin sentyabrında debüt etdiyi İspaniya yığmasının heyətində 16 oyun keçirib, 3 qol vurub, 9 məhsuldar ötürmə verib.
Lamin Yamalın qənimətlər muzeyində “Barselona” ilə 2022/2023-cü illər mövsümündə qazandığı İspaniya La Liqası var. Həmçinin Yamal İspaniya yığması ilə AÇ-2024-ün qalibi olub.
“Transfermarkt” internet-portalı 17 yaşlı ispaniyalı cinah hücumçusunun transfer dəyərini 120 milyon avro məbləğində qiymətləndirir.
