İtaliyanın “Verona” klubunun serbiyalı vingeri Stefan Mitroviç A Seriyası təmsilçisindən ayrılaraq Belçika “Leuven”inə keçib.
Arena.az xəbər verir ki, Belçika klubu gənc yarımmüdafiəçini satınalma şərti ilə icarəyə götürüb.
22 yaşlı futbolçunun icarə müddəti bu mövsümün sonuna (2025-ci ilin 30 iyununa qədər) nəzərdə tutulub. Futbolçunun transfer hüquqlarının alınması isə onun yeni komandasındakı performansından asılı olacaq.
Xatırladaq ki, Stefan Mitroviç Serbiyanın “Radniçki” klubunun yetirməsidir. 2022-2024-cü illər aralığında “Srvena Zvezda”da da çıxış etmiş serb vinger “Verona”ya bu ilin fevralında 1,3 milyon avro qarşılığında keçmişdi. O, İtaliya klubunun heyətində 10 oyuna çıxsa da, fərqlənə bilməyib.
Mitroviç Serbiyanın U-20 və U-21 yığmalarında oynadıqdan sonra 2022-ci ildə ölkəsinin əsas millisində debüt edib. O, yığmanın heyətində 4 oyuna çıxıb, hələ fərqlənə bilməyib.
“Transfermarkt” internet-portalı 22 yaşlı vingerin transfer dəyərini 1,8 milyon avro məbləğində qiymətləndirir.
