“SpaceX” kosmik şirkətinin sahibi İlon Mask bildirib ki, iki il ərzində Marsa beş pilotsuz “Starship” gəmisi göndərəcək.
Modern.az xarici KİV-ə istinadla xəbər verir ki, Mask özünün “X” sosial platformasındakı səhifəsində yazıb: “SpaceX iki il ərzində Marsa təxminən beş ekipajsız “Starship” gəmisi göndərməyi planlaşdırır. Əgər onların hamısı təhlükəsiz yerə enərsə, dörd ildən sonra ekipajla missiyalar da mümkündür. Problemlərlə qarşılaşsaq, o zaman pilotlu missiyalar daha iki il təxirə salınacaq”.
Mask bu ilin əvvəlində bildirmişdi ki, ilk ekipajsız “Starship” gəmisi Marsa beş ildən sonra, ilk ekipaj isə yeddi ildən sonra buraxılacaq. Gəmini daşıyan raket iyun ayında dördüncü cəhdində dünya ətrafında tam sınaq səyahətini tamamladı, kosmosdan alovlu, səsdən sürətli qayıdış prosesindən salamat çıxdı və Hind okeanında əsaslı eniş nümayişini həyata keçirdi. Üstəlik, Mask bu onilliyin sonunda sərnişinlər və yüklərlə Marsa və Aya səyahət edə biləcək böyük, çoxfunksiyalı yeni nəsil kosmik gəmi yaratmaq məqsədinə çatmaq üçün “Starship”ə güvənir.
NASA bu ilin əvvəlində “SpaceX” şirkətinin “Starship” gəmisindən istifadə edərək Aya ekipajlı enişi həyata keçirəcək “Artemis 3” missiyasını 2026-cı ilin sentyabrına qədər təxirə saldı. NASA-nın məlumatına görə, buraxılış 2025-ci ilin sonuna planlaşdırılıb.
Yapon milyarder Yusaku Mayezava iyun ayında “SpaceX” şirkətinin “Starship” gəmisindən istifadə etməli olduğu Ay ətrafında şəxsi missiyasını raketin inkişafındakı qeyri-müəyyənlikləri əsas gətirərək ləğv etmişdi.
