Türk Dövlətləri Təşkilatına (TDT) üzv ölkələr “Türktransplant” sistemini yaradacaq.
Azərbaycanın Şuşa şəhərində TDT Səhiyyə Nazirlərinin 4-cü toplantısı keçirilib.
Azərbaycanın səhiyyə naziri Teymur Musayevin ev sahibliyi etdiyi görüşdə TDT-nin baş katibi səfir Kubaniçbek Ömurəliyev, Türkiyənin səhiyyə naziri Kemal Memişoğlu, Qırğızıstan səhiyyə naziri Alimkadır Beyşənəliyev, Özbəkistanın səhiyyə nazirinin müavini Davron Sultanov və Qazaxıstanın səhiyyə nazirinin müavini Yerbol Ospanov iştirak ediblər.
İclasda çıxış edən T.Musayev bildirib ki, TDT-yə üzv və müşahidəçi ölkələr arasında vahid tibb elmi sahəsinin yaradılması, birgə elmi tədqiqatların aparılması və vahid tibb təhsili standartlarının müəyyən edilməsini birgə fəaliyyətlərinin əsas istiqamətləri kimi görürlər.
Görüşdən sonra nazirlər TDT çərçivəsində orqan və toxuma transplantasiyası ilə bağlı məlumat və təcrübə mübadiləsinə imkan verəcək “Türktransplant” sisteminin yaradılması ilə bağlı niyyət protokolunu imzalayıblar.
Bundan əlavə, TDT-yə üzv və müşahidəçi ölkələrin səhiyyə nazirliklərinin elmi tədqiqat institutları arasında onkologiya, kardiologiya, oftalmologiya, pediatriya, travmatologiya və ortopediya sahələrində anlaşma memorandumları imzalanıb.
