ABŞ Prezidenti Co Bayden çərşənbə günü, oktyabrın 9-da İsrailin Baş naziri Benyamin Netanyahu ilə yəhudi dövlətinin İrana zərbə endirmək planlarını telefonla müzakirə edə bilər.
Yeniavaz.com xəbər verir ki, bu barədə “Axios” portalı Amerika rəsmiləri arasından olan mənbələrə istinadən məlumat yayıb.
Nəşr qeyd edir ki, Baydenin çərşənbə günü səhər Netanyahu ilə İsrailin İrana zərbə endirmək planları ilə bağlı kritik telefon danışığı aparacağı gözlənilir:
“Bayden və Netanyahu arasındakı bu söhbət iki gərgin ayda ilk ola bilər və İsrailin ciddi eskalasiyaya səbəb ola biləcək genişmiqyaslı zərbəni nəzərdən keçirdiyi bir vaxta təsadüf edir. İsrailin cavabının əhəmiyyətli olacağı gözlənilir, o cümlədən İrandakı hərbi hədəflərə hava hücumları və Tehranda HƏMAS lideri İsmayıl Haniyəni öldürən hücum kimi gizli hücumlar”.
Nəşr bildirir ki, guya İsrail İrandakı neft obyektlərinə də hücum ehtimalını nəzərdən keçirir.
İsrail baş nazirinin köməkçiləri arasında olan mənbə nəşrə bildirib ki, qərar qəbul edildikdən sonra Netanyahu Baydenə məlumat vermək istəyəcək.
“Biz bu çağırışdan İsrailin cavabının sərhədlərini müəyyən etməyə çalışmaq üçün istifadə etmək istəyirik. ABŞ İsrailin zərbəsinin qeyri-mütənasib olmadan əhəmiyyətli olmasını istəyir”, - ABŞ rəsmisi qeyd edib.