Milli təhlükəsizlik üzrə məsləhətləşmələr zamanı İsrailin baş naziri Benyamin Netanyahu və müdafiə naziri Yoav Qalant İrana mümkün cavab hücumunun planı və vaxtı barədə razılığa gəliblər. Əməliyyat başlanılması Nazirlər Kabinetdən son təsdiq tələb edir.
Qaynarinfo "Kommersant”a istinadən xəbər verir ki, bu barədə İsrailin "Kan” dövlət televiziyası məlumat yayıb.
Benyamin Netanyahu oktyabrın 9-da telefon danışığı zamanı ABŞ prezidenti Co Baydenlə İranın raket hücumuna mümkün cavab variantlarını müzakirə edib. Oktyabrın 10-da Netanyahu cavab hücumunun məqsədlərini razılaşdırmaq üçün İsrail Təhlükəsizlik Kabinetini çağırıb. Lakin İsrail mediası yazıb ki, bu barədə yekun qərar qəbul edilməyib.
Eyni zamanda, "The Washington Post” yazıb ki, söhbət zamanı Benyamin Netanyahu Amerika prezidentini əmin edib ki, İsrail İranın nüvə və ya neft obyektlərinə deyil, hərbi obyektlərinə hücum etməyə hazırdır. Qəzetin mənbələri Co Baydenin THAAD raketdən müdafiə sistemini İsrailə göndərmək qərarında məhz İsrailin baş nazirinin mötədil mövqeyinin rol oynadığını qeyd edib.
"The Washington Post” qəzetinə müsahibə verən analitiklər qeyd edirlər ki, İsrailin İranın neft obyektlərinə hücumu enerji qiymətlərində kəskin sıçrayışa səbəb ola bilər, İranın nüvə obyektlərinə hücum isə münaqişənin daha da genişlənməsinə, o cümlədən ABŞ-ın birbaşa müdaxiləsi ehtimalına səbəb olacaq.
Oktyabrın 1-də İran İsrailə hücum edərək 200-dən çox raket atıb, onların əksəriyyəti hava hücumundan müdafiə sistemi tərəfindən vurulub. Tehran zərbəni sentyabrın 27-də Beyruta İsrail ordusunun endirdiyi zərbələr nəticəsində öldürülən Hizbullah qruplaşmasının lideri Həsən Nəsrullah və SEPAH-ın general-mayoru Abbas Nilforuşanın ölümünə cavab adlandırıb. İranın hücumundan sonra İsrail ordusu "ciddi və əhəmiyyətli cavab” vəd edib.
Nizami Bağırov
