Kreml Ukraynaya qarşı müharibəni maliyyələşdirmək üçün əhalidən alınan vergiləri artırmalı olacaq.
Reyting.az “Röyters”ə istinadla xəbər verir ki, iqtisadçılar gəlirlərin artırılması üçün elan edilmiş tədbirlərin kifayət etməyəcəyinə inanırlar.
Rusiya Federasiyasının 2025-ci il büdcəsi layihəsində ÜDM-nin 6,3 faizi ordunun hərbi ehtiyaclarına ayrılıb. Agentlik bunun “Soyuq müharibə”dən bəri ən yüksək rəqəm olduğunu vurğulayıb. Bundan əlavə, müdafiə xərclərinin payı ilk dəfə olaraq sosial xərclərdən iki dəfə çox olacaq.
Qeyd olunur ki, iri vergi islahatı 2025-ci ildə ÜDM-nin 1,7 faizi həcmində əlavə gəlirlər gətirəcək. Hətta bunu ekspertlər qeyri-kafi hesab edirlər.
“Alfa Wealth”dən rus iqtisadçısı Aleksey Klimyuk deyib ki, daxili vergilərin tənzimlənməsi hakimiyyətin diqqət mərkəzində qalacaq: “Ola bilsin ki, 2025-ci ildə vergi qanunlarına və qaydalarına dəyişiklik etmək üçün bir çox təşəbbüslər görəcəyik”.
Hərbi xərclərin böyük artımı ilə əlaqədar Rusiya iqtisadiyyatında inflyasiya istiliyi yarana bilər. Agentlik qeyd edib ki, faiz dərəcələri artıq 2003-cü ildən bəri ən yüksək səviyyəyə yüksəlib və rubl dollara nisbətdə son bir ilin minimum səviyyəsinə düşüb.
Neft qiymətlərinin gözlənilən ucuzlaşması Rusiya iqtisadiyyatına da mənfi təsir göstərəcək. Büdcə layihəsində resursun dəyərinin 2024-cü ildə orta hesabla 70 dollar/bareldən 2027-ci ildə 65,5 dollar/barelə enəcəyi nəzərdə tutulur.
Alfa-Bankın baş iqtisadçısı Natalya Orlova bildirib ki, Rusiya dövlət büdcəsini doldurmaq üçün əlavə gəlir mənbələri axtarmalı olacaq: “Bu struktur büdcənin neft qiymətlərindən güclü asılılığını qoruyub saxlayır. Bu o deməkdir ki, 2025-ci ildə olmasa, növbəti illərdə əlavə gəliri haradan tapmaq sualı yenidən gündəmə gələcək”.
Daha əvvəl qeyd olunurdu ki, Rusiyada çox yüksək müdafiə xərclərinə görə maliyyə böhranı yaranır. Analitik Peter Doran bildirib ki, Kreml hökumətin təxminən 436 milyard dollarlıq xərcinin 145 milyard dollarını müdafiəyə xərcləməyi gözləyir.
Bundan əlavə, “Washington Post” Rusiya iqtisadiyyatının həddən artıq qızdığını bildirib. Buna baxmayaraq, Kreml Ukraynaya qarşı müharibəni davam etdirə biləcək.
V. QULİYEV
