Beynəlxalq reytinq agentliyi “S&P Global Ratings” Türkiyənin suveren kredit reytinqini “B+”dən “BB-“ səviyyəsinə yüksəldib.
“Report” xəbər verir ki, bu barədə Türkiyənin xəzinə və maliyyə naziri Mehmet Şimşek “X” sosial şəbəkəsindəki səhifəsində yazıb.
Beləliklə, Türkiyə bu il ərzində hər üç aparıcı agentliyin (S&P, “Moody's” və “Fitch”) reytinqlərində birdən birə iki pillə yüksələn yeganə ölkə olub.
Onun sözlərinə görə, S&P-nin qərarına təsir edən əsas amillər bunlar olub:
- İqtisadiyyatda tarazlığın bərpası;
- Cari əməliyyatlar hesabının kəsirinin və xarici maliyyələşdirmə ehtiyacının azaldılması;
- Türkiyə lirəsinin sabitləşməsi;
- Valyuta ehtiyatlarının gücləndirilməsi;
- Dayanıqlı dezinflyasiya prosesi.
“Hökumətin iqtisadi proqramı nəticəsində əldə edilən müsbət irəliləyişlər Türkiyənin ölkə risklərini də azaldıb və xarici borclanma dəyərlərini əhəmiyyətli dərəcədə ucuzlaşdırıb. Gələcəkdə daha da yüksək reytinqin mümkünlüyünə işarə edən bazar göstəriciləri qarşıdan gələn dövrdə də müsbət dinamikanın davam edəcəyini göstərir”, - M. Şimşek vurğulayıb.
