Ukrayna hökuməti Dünya Bankı ilə 600 milyon dollara yaxın vəsaitin ayrılmasını nəzərdə tutan saziş imzalayıb.
APA xəbər verir ki, bu barədə ölkənin baş naziri Denis Şmıqal öz “Telegram” hesabında məlumat verib.
“Ukrayna yeni proqram çərçivəsində Dünya Bankı ilə demək olar ki, 600 milyon dollar dəyərində müqavilə imzalayıb”, - paylaşımda deyilir.
Şmıqalın sözlərinə görə, bu vəsait kiçik və orta biznesin dəstəklənməsinə, yaşıl keçidə, biznes mühitinin yaxşılaşdırılmasına və rəqəmsallaşmaya sərf olunacaq.
Baş nazir bu vəsaitin Kiyevə hansı əsasla; kredit kimi və ya yardım kimi veriləcəyi ilə bağlı məlumat verməyib.
Qeyd edək ki, sentyabr ayında ölkənin dövlət borcu 155,56 milyard dollara, yəni rekord həddə çatıb. Hökumətin hazırladığı 2025-ci il büdcə layihəsində 1,6 trilyon qrivna (38,68 milyard dollar) kəsir var və milli valyutanın məzənnəsinin bir dollar üçün 45 qrivnaya endirilməsi planlaşdırılır.
