Çinin Vətəndaşlıq İşləri Nazirliyi cümə günü ölkədə evlilik nisbətləri ilə bağlı son məlumatı açıqlayıb. Əgər tendensiya belə davam edərsə, rekordların başladığı 1980-ci ildən bəri ən aşağı rəqəmlər müşahidə ediləcək.2024-cü ilin ilk üç rübündə Çində 4,74 milyon cütlük evləndiyi halda, keçən ilin eyni dövründə bu rəqəm 5,69 milyon olub. Beləliklə, nikah nisbətində 16,6 faiz azalma qeydə alınıb. 2013-cü ildə 13 milyon toyla zirvəyə çatan nikahların sayı 2022-ci ildə 6,83 milyona enib. 2024-cü ildə bu rəqəmin daha da azalacağı gözlənilir.Çində nikahların azalması ilə yanaşı doğum nisbətinin azalması da ciddi narahatlıq doğurur. 2022-ci ildə 1 milyard 411 milyon olan Çin materikinin əhalisi 2023-cü ildə 1 milyard 409 milyona düşüb. 2022-ci ildə doğum səviyyəsi 1949-cu ildə Çin Xalq Respublikasının qurulmasından bəri ən aşağı səviyyəyə çatıb.Əhalinin azalmasının qarşısını almaq üçün Çin 2015-ci ildə tək uşaq siyasətini dayandırıb və cütlüklərə vergi güzəştləri kimi təşviqlər təklif edib. Bununla belə, artan yaşayış xərcləri səbəbindən bir çox cütlük uşaq sahibi olmağı təxirə salmağı və ya imtina etməyi seçir.Çin Əhali və İnkişaf Araşdırma Mərkəzi doğum nisbətlərinin azalmasının səbəblərini araşdırmaq üçün 150 əyalətdə 1500 icmadan 30 000 insanla müsahibə almağı planlaşdırır. İşçi qüvvəsinin azalması səbəbindən Çin hökuməti pensiya yaşını yüksəltmək üçün yeni qaydaları da nəzərdən keçirir.Yaponiya və Cənubi Koreya kimi digər Asiya ölkələri də oxşar əhali problemi ilə üzləşirlər. Görülən tədbirlər bu ölkələrdə hələ də istənilən nəticəni verməyib.Mənbə: Independent
