Qeyri-rəsmi ilk nəticələrin açıqlanması ilə Donald Tramp Floridada etdiyi çıxışında qələbəsini elan edib. O, seçkilərin nəticəsini "tarixi və siyasi bir zəfər" olaraq xarakterizə edib. Tramp "Tarix yazdıq. 47-ci prezidentinizi seçdiyiniz üçün təşəkkür edirəm. Hər gün sizin üçün mübarizə aparacağam. Bu, ABŞ üçün qızıl dövr olacaq. Bu, bizim üçün böyük bir zəfərdir" deyib.
ABŞ-da prezidenti 538 nəfərdən ibarət Seçicilər Kollegiyası müəyyən edir. Bir namizədin Ağ Evə getməyə haqq qazanması üçün 270 nümayəndənin səsini qazanması lazımdır. Qeyri-rəsmi məlumatlara görə, Tramp 267 nümayəndə, Demokrat Partiyanın namizədi Kamala Harris isə 224 nümayəndə qazanıb. Seçicilər Kollegiyası nümayəndələri 17 dekabrda kimin qalib gəldiyini rəsmi olaraq elan edəcək. Prezident 6 yanvarda Senat tərəfindən təsdiq olunacaq. 20 yanvarda isə ABŞ-ın yeni prezidenti Konqresdə and içərək Ağ Evdə vəzifəni mövcud prezident Co Baydendan təhvil alacaq.
Seçkidə 435 yerlik Nümayəndələr Palatasının bütün üzvləri və 100 üzvü olan Senatda 34 yerin sahibləri də müəyyən ediləcək. Qeyri-rəsmi nəticələrə görə, Respublikaçı Partiya həm Nümayəndələr Palatasında, həm də Senatda əksəriyyəti əldə etmiş vəziyyətdədir.
