UEFA Çempionlar Liqasının Liqa mərhələsinin “Arsenal”la (İngiltərə) ev oyunu “İnter”in (İtaliya) qapıçısı Yan Zommer üçün əlamətdar olub.
Arena.az bu barədə “Squawka” dərgisinə istinadən məlumat verir.
Belə ki, Çempionlar Liqasında bir klub üçün keçirdiyi oyunlarda “quru” oyunların sayına görə ən yaxşı qapıçının adı məlum olub. ÇL-də bir klub üçün keçirdiyi oyunlarda “quru” oyunların sayına görə ən yaxşı qapıçı “İnter”in isveçrəli qapıçısı Yan Zommerdir.
35 yaşlı isveçrəli qapıçı “İnter” üçün Çempionlar Liqasında 11 oyuna çıxıb, bu oyunların 8-də qapısının toxunulmazlığını qoruya bilib. Faiz göstəricisi ilə müvafiq nəticə 73%-ə bərabərdir. Beləliklə, Zommer bütün yarış tarixində bir klubun heyətində ən azı 10 oyun keçirmiş bütün qapıçılar arasında ən yaxşı nəticəyə malik qapıçıdır.
Bundan əlavə, isveçrəli qapıçı qitənin ən mötəbər klub yarışında “İnter”in heyətində ümumilikdə 39 qurtarış edib və cəmi 4 qol buraxıb. Çempionlar Liqasının cari mövsümündə isə Zommer bir qol belə, buraxmayıb.
Yan Zommer “İnter”ə 2023-cü ilin avqustunda 6,75 milyon avro məbləğ müqabilində “Bayern”dən keçib. İsveçrəli qapıçının “neradzurri” ilə müqaviləsi 2026-cı ilin iyun ayının sonuna qədər qüvvədədir.
Zommer cari mövsümdə “İnter”in heyətində 15 oyuna çıxıb, 13 qol buraxıb, 9 oyunda qapısının toxunulmazlığını təmin edə bilib. İsveçrəli qapıçının “İnter” karyerası ümumilikdə 58 oyun, 36 buraxılmış qol və 34 “quru” oyundan ibarətdir.
Zommer 2023/2024-cü illər mövsümü “İnter”lə İtaliya A Seriyası çempionluğunu və İtaliya Kubokunu qazanıb.
Yan Zommer heyətində çıxışını artıq başa vurduğu İsveçrə yığmasında 2012-ci ilin may ayında debüt edib. Yan İsveçrə yığmasında 94 oyun keçirib və 92 qol buraxıb, 35 oyundan isə “quru” qurtulub.
Zommer “İnter”dən öncə “Bayern”, “Borussiya” (Mönhenqladbax), “Qrasshopper”, “Vaduts” və “Bazel”də çıxış edib.
“Transfermarkt” internet-portalı 35 yaşlı isveçrəli qapıçının transfer dəyərini 5 milyon avro məbləğində qiymətləndirir.
