“Bu dəfə əsasən oyunla bağlı danışdıq”.
Bu sözləri Sportinfo.az-a açıqlamasında “Turan Tovuz”un braziliyalı hücumçusu Aleks de Souza deyib.
Premyer Liqanın 12-ci turunda “Turan Tovuz”la “Qarabağ” üz-üzə gəldi. Qərb rayonunda keçirilən matç 0:0 bitdi.
Qarşılaşma başa çatandan sonra “Qarabağ”la “Turan”ın heyətindəki braziliyalı futbolçular uzun müddət meydanın mərkəzində söhbət etməklə diqqət çəkdi. Sanki aylardır bir-birlərini görmürdülər.
Aleks “asudə vaxtlarda Bakıda bir araya gəlirsiz, yoxsa buna imkan olmur” sualına cavabında bunları söyləyib:
“Təbii ki, fürsət olduqca görüşürük. Ancaq o cür görüşlərimiz əsasən şəxsi həyatla əlaqəli söhbətlərlə, bir-birimizlə zarafatlarla bağlı olur.
“Qarabağ”dakı braziliyalıların hər biri ilə əla münasibətim var”.
