Fransa ilə Azərbaycan arasında münasibətlər böhran kimi səciyyələndirilməlidir.
Bunu Fransanın “Le Monde” qəzetinə müsahibəsində Azərbaycan Prezidentinin xüsusi tapşırıqlar üzrə nümayəndəsi Elçin Əmirbəyov deyib.
Onun sözlərinə görə, ölkələr arasında münasibətlərin bu həddə çatmasında birbaşa Fransa məsuliyyət daşıyır.
“Paris bu vəziyyətdən çıxış yolu tapmaq istəyirsə, ilk növbədə Azərbaycana qarşı düşmənçilik hərəkətlərini dayandırmalı, həmçinin Ermənistana silah tədarükünü dayandırmalıdır”, - Əmirbekov vurğulayıb. “Bu yanaşma təkcə ikitərəfli münasibətlərə xələl gətirmir, həm də kövrək sülh prosesinə son dərəcə mənfi təsir göstərir”.
“Əvvəllər münasibətlərimiz normal idi və yaxşı inkişaf edirdi. Təəssüf ki, bu məsələyə peşəkarlıqla yanaşanların, Azərbaycana dost kimi baxanların səsi Fransada ümumiyyətlə eşidilmir. Fransa münasibətləri yaxşılaşdırmaq üçün müəyyən addımlar atmalıdır”, - diplomat əlavə edib.
Əmirbəyov “L'Opinion” qəzetində də məqalə dərc edib və qeyd edir ki, Fransanın hazırkı hökuməti Azərbaycanda iqtisadi maraqlara baxmayaraq, Bakı ilə münasibətləri böhrana gətirib çıxarıb.
“Eyni zamanda, münasibətlərimizdəki böhran ikitərəfli iqtisadi münasibətlərə mənfi təsir göstərir. Makron (Fransa prezidenti – red.) sələflərindən fərqli olaraq balanslaşdırılmış siyasətdən əl çəkərək açıq şəkildə Ermənistanın mövqeyini dəstəkləyib və bütün mümkün problemlərə görə Azərbaycanı günahlandırıb. Bu, münasibətlərin indiki səviyyəyə çatmasına səbəb oldu”, - deyə Əmirbəyov bildirib.
