“Gossip Girl” serialında Savyer Bennet obrazını canlandıran məşhur aktrisa Şanel Maya Banks 30 oktyabrdan bəri itkin düşüb.
News24.az xəbər verir ki, Los-Anceles polis idarəsi Banksin itkin düşdüyü barədəki məlumatları təsdiqləyib və ailəsi gənc aktrisanın tapılması üçün ictimaiyyətdən dəstək istəyib. Lakin bəzi şəxslərin Banksin şəxsiyyət vəsiqəsindən istifadə etməsi vəziyyəti daha da mürəkkəbləşdirib.
Ailəsi Şanelin sonuncu dəfə 30 oktyabr tarixində Los-Ancelesdə görüldüyünü bildirib və həmin vaxtdan sonra ondan heç bir xəbər alınmadığını qeyd edib. Bu müddət ərzində yaşanan qeyri-müəyyənlik ailənin narahatlığını artırıb.
Polis qeyd edib ki, Banksin evini dəfələrlə yoxlayıb və araşdırmalarını davam etdirir, amma hələ də heç bir iz tapmayıblar.
Şanel Maya Banksin qohumu Danielle-Tori Sinq sosial şəbəkə platformasında açıqlama verərək, ictimaiyyətə müraciət edib və aktrisanın hələ də itkin olduğunu bildirib. Danielle-Tori Sinq bəzi şəxslərin Şanelin tapıldığını iddia etdiyini, amma tapılan şəxsin Banksin müddəti bitmiş bir Nyu-York şəxsiyyət vəsiqəsini istifadə edən başqa biri olduğunu açıqlayıb. Sinq ailənin narahatlığını paylaşaraq insanların Şaneli tapmaq üçün axtarışları dayandırmamalarını xahiş edib.
Banksin ailəsi, gənc aktrisanın təxminən bir il əvvəl evlənərək həyat yoldaşı ilə sadə bir həyat qurduğunu və keçən noyabrdan etibarən aktyorluqdan uzaqlaşaraq yazıçılığa başladığını açıqlayıb.
Şanel Maya Banksin anası sosial mediada etdiyi paylaşımda, pərəstişkarlarından qızına dua etmələrini istəyib. Ailə üzvləri bu müddət ərzində dəstək istəyərək, polis tərəfindən veriləcək xəbərləri səbirsizliklə gözlədiklərini bildirib.
Şanelin itkin düşməsi ailəsi, dostları və pərəstişkarları arasında dərin narahatlıq yaradıb, səlahiyyətlilər isə araşdırmalara intensiv şəkildə davam edirlər.
