Rusiyanın enerji şirkəti “Qazprom” iddia edib ki, Avropa İttifaqı (Aİ) ölkələri öz iqtisadiyyatlarına zərər vurmaq hesabına təbii qaza olan tələbatı süni şəkildə məhv etməyi hədəfləyirlər.
"Cebheinfo.az" xəbər verir ki, Avstriyanın enerji şirkəti OMV arbitraj qərarında "Qazprom"-dan 230 milyon avro təzminat qazandıqdan sonra Rusiya enerji şirkəti Aİ ölkələrini təbii qaza tələbatı süni şəkildə azaltmaqda ittiham edib. "Qazprom" tərəfindən verilən yazılı açıqlamada qlobal təbii qaz sektorundakı inkişaflarla bağlı qiymətləndirmələr yer alıb.
Açıqlamada qlobal təbii qaz istehlakının bu ilin ilk 10 ayında keçən ilin eyni dövrü ilə müqayisədə 80 milyard kubmetr artdığı, Rusiya, Çin və Hindistanın isə bu artımla 70 faizdən çox paya sahib olduğu bildirilib.
Rusiya qazının Çinə daşınması üçün “Sibirin Gücü” boru kəmərinin maksimum tutumuna çatmaq üçün səylərin davam etdiyinə diqqət çəkilərək, “Uzun müddətdə Çində qaz istehlakının artım templəri yüksək qalacağı gözlənilir",-deyilib.
Eyni zamanda, Qazaxıstan, Özbəkistan və Qırğızıstan kimi Orta Asiya ölkələrində də təbii qaza tələbatın artdığı bildirilib. Həmçinin Aİ-də təbii qaz istehlakının azalmağa davam etdiyi bildirilir:
"Aİ ölkələri öz iqtisadiyyatlarına zərər vurmaq hesabına təbii qaza olan tələbatı süni şəkildə məhv etməyi hədəfləyirlər".
Açıqlamada Avropada qaz tələbatının azalmağa davam edəcəyi ilə bağlı qiymətləndirmə yer alarkən, Avropanın öz resurslarının tükənməsi səbəbindən uzunmüddətli perspektivdə qaz hasilatını artırmasının gözlənilmədiyi izah edilib.
Avstriyada yerləşən neft-qaz şirkəti OMV, Beynəlxalq Ticarət Palatasının (ICC) qaydalarına əsasən, "Qazprom Export"-un Almaniyaya qeyri-müntəzəm qaz tədarükünü təmin etdiyi səbəbi ilə açdığı arbitraj işində 230 milyon avro təzminat qazanıb. Qərarda OMV-nin "Qazprom Export"-dan faizlər və xərclər də daxil olmaqla 230 milyon avro zərəri toplaya biləcəyi müəyyən edilib. Arbitraj qərarı əsasında ödəniş OMV-nin Avstriyanın qaz tədarükü müqaviləsi çərçivəsində "Qazprom Export"-a ödədiyi ödənişlərdən kompensasiya ediləcək.
Vyanada yerləşən şirkət təsdiqləyib ki, "Qazprom Export" tərəfindən mümkün tədarükün dayandırılması halında müştərilərinə vəd edilmiş qaz həcmlərini tam şəkildə təmin edə bilər. OMV Almaniyaya qeyri-müntəzəm qaz tədarükü səbəbindən 2022-ci ildə məruz qaldığı maliyyə itkilərinə görə "Qazprom Export"-a qarşı arbitraj işi qaldırıb. Qaz qiymətləri hazırda 4 dekabr 2023-cü ildən bəri ən yüksək səviyyədədir.
