Qaxda sarağan ağaclarının yaratdığı mənzərə görənləri heyrətləndirir. İlin bütün fəsillərində bənzərsiz təbiəti ilə göz oxşayan Qax rayonunda payız başqa bir gözəlliyi, mənzərəsi ilə diqqəti cəlb edir.
Bizim.Media-nın yerli bürosu xəbər verir ki, xüsusən oktyabr və noyabr aylarında Şəki-Qax avtomobil yolunun Qax şəhəri istiqamətində təbiət sanki dil açıb insanla danışır.
Böyük Qafqazın ətəklərinə sığınan Qaxa gələrkən Kürmük çayını keçən andan sanki bir sehrli mənzərə ilə qarşılaşırsan. Hava küləkli olmasaydı elə bilərdin bu mənzərəni rəssam tabloda əks etdirib.
Hər dəfə avtomobillə yoldan keçərkən burada səliqə-sahmanlama işləri aparıldığını, ərazinin nizamında olduğunu, bağbanların gün ərzində çalışdığını görmək mümkündür.
Gördüyü işdən zövq alan bağban müsahibim Elşad Əhmədov sarağan ağacının yaz fəslində başqa bir gözəlik yaratdığını, payızda isə dekabr ayına kimi yarpaqları ilə təbiətə sanki meydan oxuduğunu bildirir. Bağban onu da diqqətə çatdırır ki, Kürmük çayından üzü Zaqatala istiqamətində 5 km-ə yaxın bir məsafəni hissə-hissə belə gözəlliyə qərq etmək, insanlarda xoş-əhval ruhiyyə yaratmaq istəyirlər. Təkcə bu il xeyli sayda yeni sarağan tingləri əkiblər.
Yeri gəlmişkən bu əraziləri mal-qaradan, qoyun-quzudan qorumaq üçün Elşad Əhmədov həmkarları ilə səhərdən axşama kimi ərazidə bir əsgər kimi keşik çəkdiklərini də bildirir.
Müsahibim onu da deyir ki, hava bu qədər güləkli olmasaydı mütləq indi yoldan keçənlər dayanıb bu gözəlliyi telefonun kamerasına çəkməmiş keçməyəcəkdilər.
Payız mənzərəsindən, yaşıllıq zolağından söhbət düşmükən Kürmük çayı ətrafında həyata keçirilən bir xeyrxah əməl haqda da danışmaq yerinə düşər. 8 il əvvəl Kürmük çayın yararsız daşlıq və gilli ərazisində xan çinar və sərv ağaclarının əkini aparılmağa başlanarkən heç kəs inanmırdı ki, qarşıdakı bir neçə ilə bu ərazilər yaşıllığı ilə göz oxşayacaq. Üzərindən illər keçəndən sonra Kürmük çayı üzərindəki körpüdən ərazini seyr edərkən insan zəhmətinin hədər getmədiyinə inanırsan.
Sarağan ağacının qızılı payız mənzərəsindən bəhs etmişkən onun sənayedəki əhəmiyyətini də vurğulamaq yerinə düşər.
Görkəmli Azərbaycan maarifçisi, dramaturqu və etnoqrafı Rəşid bəy Əfəndiyev özünün “Azərbaycanın Şəki əyalətində ipəkçilik oçerki”ndə Şəkini Çinlə eyni səviyyədə tutaraq ipəkçiliyin vətəni adlandırıb və ipəyin keyfiyyətli və təbii alınmasında sarağan boyasının xüsusiyyətlərindən bəhs edib. Bunu bəzi tarixi mənbələr də təsdiq edir.
Təsadüfi deyil ki, 2014-cü ilin noyabr ayında Azərbaycan kəlağayısı UNESCO-nun Bəşəriyyətin qeyri maddi mədəni irsi üzrə Reprezentativ Siyahısına “Qadın ipək baş örtüyü kəlağayını ənənəvi hazırlanma və daşınma mədəniyyəti və onun simvolikası” adı ilə daxil edilib.
Tural Rasimoğlu, Bizim.Media, Şimal-Qərb bürosu
- Ночной Режим
- Домашняя страница
- Статистика
- Источники
- Рейтинг
- Погода
- Валюта
