ABŞ-da indiyədək baş verən ən böyük kriptovalyuta oğurluqlarından birinin gəlirlərini yuyan haker beş il həbs cəzasına məhkum edilib.
Valyuta.az xəbər verir ki, İlya Lixtenşteyn 2016-cı ildə "Bitfinex" kriptovalyuta birjasına hücum edərək təxminən 120 min "Bitcoin" oğurladığı ittihamını keçən il qəbul etmişdi.
Oğurluq zamanı "Bitcoin"in dəyəri təxminən 70 milyon dollar idi, lakin onlar həbs ediləndə bu məbləğ 4,5 milyard dolları aşmışdı.
Oğurlanmış kriptovalyutalar həyat yoldaşı Heather Morqan ilə birlikdə yuyulub. Morqan "Razzlekhan" ləqəbi ilə tanınan hip-hop musiqiçisidir.
ABŞ Ədliyyə Nazirliyinin baş prokuror müavini Liza Monako o vaxtkı açıqlamasında məhkəmə tərəfindən 3,6 milyard dollar dəyərində olan vəsaitin müsadirə edilməsinin Ədliyyə Nazirliyinin tarixində ən böyük maliyyə müsadirəsi olduğunu bildirmişdi.
Bölgə hakimi Kolin Kollar-Kotelli qərarında, "Bu cür cinayətlərin cəzasız qalmayacağı və nəticələrinin olacağı mesajını vermək vacibdir", - deyə vurğulayıb.
Kibercinayətlərlə mübarizə aparmaq istədiyini bildirib
2022-ci ilin fevralında həbs edilən Lixtenşteyn həbsxanada olduğu müddətdə hərəkətlərindən peşman olduğunu ifadə edib.
O, həmçinin cəzasını çəkdikdən sonra kibercinayətlərlə mübarizə sahəsində bacarıqlarını istifadə etməyi planlaşdırdığını qeyd edib.
Heather Morqan da keçən il çirkli pulların yuyulması ilə bağlı sui-qəsd ittihamını qəbul edib. Onun cəzası 18 noyabr tarixində elan ediləcək.
Məhkəmə sənədlərinə görə, Lixtenşteyn "Bitfinex"i haker hücumu ilə sındırmaq üçün yüksək səviyyəli texniki vasitələr və üsullardan istifadə edib.
Hücumdan sonra oğurlanmış vəsaitləri yumaq üçün Morqandan kömək istəyib.
ABŞ Ədliyyə Nazirliyi açıqlamasında bildirib ki, "çoxsaylı mürəkkəb çirkli pulların yuyulması texnikaları tətbiq edilib".
Bu üsullar arasında saxta kimliklərdən istifadə, vəsaitlərin müxtəlif kriptovalyutalara köçürülməsi və qızıl alınması kimi metodlar yer alıb.
Prokurorlar bildirib ki, Rusiyada anadan olub ABŞ-da böyüyən Lixtenşteyn ailə səfərləri zamanı kuryerlərlə görüşərək yuyulmuş pulları öz ölkəsinə qaytarıb.
Rəhim
