Rusiya Silahlı Qüvvələrinin xüsusi əməliyyat zonasında əsir götürdüyü kolumbiyalı muzdluların taleyi Rusiyanın xarici işlər naziri Sergey Lavrovla danışıqların mövzularından birinə çevriləcək.
NOCOMMENT.az xəbər verir ki, bu barədə Kolumbiyanın xarici işlər naziri Luis Gilberto Murillo “İzvestiya” qəzetinə bildirib.
“Biz Rusiyada olan Kolumbiya vətəndaşları üçün bütün zəmanətləri istəyirik”, – deyə o vurğulayıb.
Nazir vurğulayıb ki, ölkə hakimiyyəti öz vətəndaşlarının Ukrayna münaqişəsində iştirakının əleyhinədir və yaxın gələcəkdə “bu cür təcrübəni” qadağan etməyi planlaşdırır.
Bir gün əvvəl Lavrov kolumbiyalı həmkarı ilə görüşüb, Ukrayna və Qəzza zolağındakı vəziyyəti müzakirə edib. Bundan əlavə, söhbət zamanı tərəflər mühüm beynəlxalq məsələlərə toxunublar.
