"Özbəkistan ekoloji problemlərin həllində Azərbaycanın təcrübəsini fəal şəkildə mənimsəyir".
Sitat.info bildirir ki, bunu Oxu.az-a açıqlamasında Özbəkistan Respublikasının Ekologiya, Ətraf Mühitin Mühafizəsi və İqlim Dəyişiklikləri Nazirliyinin Layihələrin idarə olunması şöbəsinin müdiri Timur Sabitov deyib.
"Azərbaycanda keçirilən COP29 konfransı regionumuz üçün əsas hadisəyə çevrilib. İlk dəfə olaraq Xəzəryanı dövlətdə belə miqyasda bir tədbir keçirilib. Özbəkistan bu konfransda öz mövqeyini ifadə etmək üçün səylərini birləşdirə bilib", - deyə Sabitov qeyd edib.
Onun sözlərinə görə, COP29 çərçivəsində Özbəkistan nümayəndələri bir çox tədbirlərdə iştirak ediblər, Azərbaycandan olan həmkarları ilə məsləhətləşmələr aparıblar.
"Bizə sizin ölkənizin bir sıra ekoloji problemlərin həllində təcrübəsi, xüsusən də yaşıl iqtisadiyyata keçid üçün qəbul edilmiş strategiyalar olduqca maraqlıdır. Azərbaycan Paris Sazişindən irəli gələn öhdəlikləri yerinə yetirir, şəffaflıq haqqında hesabatlar hazırlayır və istixana qazları üzrə milli töhfələri yeniləyir", - deyə nazirliyin nümayəndəsi vurğulayıb.
Sabitov səhralaşma və torpaqların deqradasiyasını Özbəkistanın əsas ekoloji problemləri olaraq qeyd edib. Bu proseslər havanın incə hissəciklərlə çirklənməsinə gətirib çıxarır ki, bu da şəhərlərdə xüsusilə nəzərə çarpır.
"Məsələn, Daşkənddə biz getdikcə daha çox toz və qum fırtınaları ilə üzləşirik", - deyə o bildirib.
Nazirlik nümayəndəsinin sözlərinə görə, səhralaşmaya qarşı mübarizə məqsədilə Özbəkistanda milli yaşıllaşdırma proqramı həyata keçirilir. Xüsusilə Daşkənd ətrafında yaşıllıq zolağı yaradılır. Oxşar tədbirlər qonşu Qazaxıstanda da reallaşdırılır.
"Yanaşmalar, prinsip etibarilə, eynidir, təkcə aparılan islahatların intensivliyi fərqlənir", - deyə Timur Sabitov əlavə edib.
Özbəkistan Azərbaycanın Ekologiya və Təbii Sərvətlər Nazirliyi ilə, xüsusilə şəffaflıq üzrə milli hesabatlarının hazırlanması istiqamətində əlaqə saxlayır.
"Biz bu ilin sonuna kimi bu hesabatı təqdim etməyi planlaşdırırıq", - deyə Ekologiya Nazirliyinin nümayəndəsi fikrini yekunlaşdırıb.
