Alimlər ilk dəfə donmuş qılınc dişli pişiyi tədqiq ediblər. 35 min il əvvəl cəmi üç həftəlik olarkən ölən balanın cəsədi donmuş torpaqda son dərəcə yaxşı qorunub saxlanılıb.
Hafta.az-ın “IFL Science”a istinadən yazdığına görə, Buz Dövründə çox yayılmış olan Homotherium cinsinə aid heyvanlar təxminən 10 min il əvvəl nəsli kəsilib. Bu heyvanların qılınc dişli pişiklər adlanan müxtəlif növləri Avrasiya, Afrika və Amerikada yaşayırdı.
2020-ci ildə Rusiyanın Yakutiya bölgəsində aparılan araşdırmalarda Homotherium latidens növünün nümunəsi aşkar edilib. Üç həftəlik ikən ölən heyvan sıfırın altındakı temperatur sayəsində tükləri, başı, bədəni və əzaları toxunulmaz olaraq çox yaxşı qorunub saxlanılıb.
“Scientific Reports” jurnalında dərc edilən araşdırmada pişiklə bağlı tapıntılarını paylaşan elm adamları bunları söyləyirlər: “Paleontologiya tarixində ilk dəfə olaraq nəsli kəsilmiş və müasir faunada analoqu olmayan məməli heyvanın görünüşü tədqiq edilib”.
Rusiya Elmlər Akademiyasının tədqiqatçıları pişik balasının təxminən 35 min il əvvəl yaşadığını təxmin edirlər.
Ölüm səbəbi bilinməyən heyvan çox gənc yaşda vəfat edib və cinsini müəyyən edən xüsusiyyəti olan dişləri hələ böyüməyib. Bununla belə, onun bədəni hələ də Buz Dövrü heyvanları haqqında qiymətli məlumatlar verir və bu, onun indiki qohumlarından nə qədər fərqli olduğunu göstərir.
Alimlər heyvanın ağzının daha geniş, qulaqlarının kiçik, ön ayaqlarının isə eyni yaşda olan şir balası ilə müqayisədə daha uzun olduğunu deyirlər. Bundan əlavə, boynu daha qalın və uzun olan qılınc dişli pişiyin tünd qəhvəyi tükləri qısa, qalın və yumşaqdır. Dondurucu temperaturda yaşayan heyvan, yaşamaq üçün bütün bu xüsusiyyətləri inkişaf etdirmiş kimi görünür.
Yeni araşdırmada qılınc dişli pişik balasının ən maraqlı xüsusiyyətlərini çatdıran komanda hazırda daha əhatəli analizlər aparır.
