Avstraliya qızıl mədən şirkəti "Resolute Mining" Mali hökuməti ilə demək olar ki, bütün fikir ayrılıqlarını həll etdiyini və yerli hakimiyyət orqanlarına 160 milyon dollar ödəməyə hazır olduğunu bildirib...
Poliqon xəbər verir ki, noyabrın 11-də "Resolute" şirkətinin baş direktoru Terens Qolohan və digər iki yüksək səviyyəli menecerin Mali hökumət rəsmiləri ilə görüşdən dərhal sonra saxlanıldığını deyib. Onlara qarşı heç bir ittiham irəli sürülməyib.
"Resolute" nümayəndələri hökumətin şirkətə qarşı vergilər, gömrük rüsumları, ofşor hesabların saxlanması və idarə edilməsi ilə bağlı iddialarını müzakirə etmək üçün səlahiyyətlilərlə görüşüblər. Şirkət keçən həftə iddiaların əsassız olduğuna inandığını bildirib. Bununla belə, bu gün, noyabrın 18-də o, anlaşma memorandumunda qeyd olunduğu kimi, Mali hakimiyyətinin şirkətlə bağlı bütün suallarının həll olunduğunu deyib. Bəyanatda deyilir ki, "Resolute" artıq hökumətə 80 milyon dollar ödəyib, daha 80 milyon dollar isə yaxın aylarda ödəniləcək.
Malidə 2020-ci il çevrilişindən sonra hərbçilər hakimiyyəti ələ keçirib. Ötən il ölkədə mədən layihələrində dövlətin payını artırmağa imkan verən qanun qəbul edilib. Və son aylarda hakimiyyət qızılın qiymətinin artması fonunda büdcəyə əlavə vəsait daxil etməyə çalışaraq ölkədə fəaliyyət göstərən xarici şirkətlərə təzyiqləri xeyli artırıb.
Belə ki, sentyabr ayında dünyanın ikinci ən böyük mədən şirkəti olan kanadalı "Barrick Gold"un top-menecerləri bir neçə sutka həbs ediliblər. Səlahiyyətlilər "Barrick"dən əvvəllər ödənilməmiş vergilər olaraq təxminən 500 milyon dollar ödəməyi, həmçinin Mali hökumətinin və yerli investorların "Lulo Guntoko" layihəsindəki payını 20%-dən 35%-ə çatdırmağı tələb ediblər. Şirkətlə səlahiyyətlilər arasında danışıqlar davam edir, lakin Kanada şirkəti artıq Mali hökumətinə 85 milyon dollar ödəyib.
Poliqon.info
